Mizoram in a tlem berah kum khat chhungin buh Matric Tonnes (MT) 1,80,000 vel a mamawh a, hetihlai hian kum liam ta 2019-2020 a Mizoram buh thar zat chu MT 60,239 a ni a. Mizoram District hrang hrang zingah Champhai District chu buhfai thar tam ber an ni. Agriculture Department chhinchhiah danin, kum liam ta 2019-20 chhunga Mizoram buh thar zawng zawng MT 60,239 atanga MT 22,904 chu tlangram lo neih (Jhum) atanga tharchhuah a ni a, a dang MT 36,357 chu leilet WRC (Kharif) atanga thar niin, WRC (Rabi) atangin MT 978 thar a ni bawk. Mizoram District 8 zingah Champhai District chu buh thar tam ber an nih laiin, Siaha District chu buh thar tlem ber an ni thung a, kum liamta ah khan Champhai District hian buh MT 15,424 an thar laiin Siaha District hian MT 1,736 chiah an thar thung a ni. Kum hmasa lam 2018-19 a Mizoram buh thar chhuah zat chu MT 60,010 niin, hemi kum aia nikum a buh thar tamna hi MT 229 a tling a. Buh thar tam ber Champhai District-in 2018-19 aia 2019-20 a buh an thar tamna pawh MT 415 a ni bawk.
Chhinchhiahna atanga a lan danin kum liamta 2019-20 ch
hung khan Mizoram-ah Buh chinna atan hectare 35,210 a zau hman niin, chungte chu Jhum (Kharif) atan hectare 18,510-ah Buh chin a ni a, WRC (Kharif)-ah hectare 16,232-a zau leh leh WRC (Rabi) atan hactre 468-a zau ah buh chin a ni.
Kum khat chhunga Mizoram Buh thar zat hi Mizoram Buh mamawh atanga chhutin zaa 34 vel chauh a tling phak a, hei vang hian zaa 65 vel chu State pawn atanga lakluh a la ngai a. Remote Sensing & Geographical Information System (GIS) hmanga mithiamte chhut danin Mizoram-ah leilet siam theih ram zawl hectare 77,466 (0.25%) a awm a, chung zinga hectare 17,000 bawr vel chauh hman tangkai a la ni. Hei hi zaa 32 chauh niin, a dang za a 68 chu leilet-a siam loh ram zawl a ni.
Comments
Post a Comment