Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

Kawlphetha MW 2 pe thei tur Solar Power Plant hawng

Zoram Energy Development Agency (ZEDA) in kawlphetha MW 2 pechhuak thei tura an duan Tlungvel-a Grid Connected Solar Photovoltaic (SPV) Power Plant chu Zirtawpni khan P&E Minister, R. Lalzirliana chuan a hawng.

Grid Connected Solar Photovoltaic (SPV) Power Plant hawnna hunah hian P&E Minister chuan India Solar Map-ah Tlungvel khua a lang ve ta chu lawm-awm a tih thu sawiin, phal taka he project atan ram petu Tlungvel khawtlang leh NGO te chunga lawmthu a sawi a. Sawrkarin kawlpetha siam-chhuah a ngaihpawimawh thu leh hemi kawnga hma lakna hrang hrang zingah Nizung chakna hmanga kawlpetha siamchhuah chu Sawrkarin a pawimawhna hriain Solar Power Policy pawh duan a nih thu a sawi bawk.

SPV Power Plant Tlungvel sak hna hi Aug. 13, 2018-ah tan niin Nov. 5, 2020 khan a enchhinna neih a ni a. He Power Plant sak nana sum ruahman chu cheng nuai 1400 niin Mizoram Sawrkar tum vek a ni a. He hna ah hian Civil leh General Component ah cheng nuai 213 sen niin Solar leh Electrical component-ah cheng nuai 1187 sen a ni. He SPV Power Plant hi Tlungvel tlang-ah bun niin Solar Module 5340 dah a ni a, kawlpetha a siamchhuah thei tam ber chu MW 2 a ni a. 1 MVA Inverter pahnih, 1 MVA Transformer pahnih, Evacuation line 33 KV LILO te, SCADA system pakhat te chu Power House ah bun a ni.

Solar Module te tlang pharh ah bun niin a Cable inzamna zawng zawng belhkhawm pawh meter 11,632 laia thui a ni a, Module tihfai nan Solar Water Pump pawh bun niin SPV Power Plant hi ram acre 5 velah bun a ni a. Kumtin he plant hian kawlpetha 3 MU (million units) vel a siamchhuah beisei a. Kum 5 chhungin a enkawl hna Operation & Maintenance hi he Plant buntu Swastik Solar Kolkata in an khawih zui dawn a ni.

Comments

Chhiar Hlawhte