MAMSol-in Mizoram-ah Sawhthing qtls 21,160 lei tawhin kumin ah lei leh tum mek a ni

Mizoram Agriculture Marketing Solution (MAMSol) chuan kum 2017 atang khan Mizoram hmun hrang hranga Sawhthing chingtute tharchhuah lei sakin kumin thlengin quintal 21,160 an leisak tawh a. Kumin ah pawh Sawhthing hi lei leh tum mek a ni bawk.

Mizoram Agriculture Marketing Solution (MAMSol) Managing Director, Zorema Darkim chuan Mizoram hmun hrang hrangah Sawhthing ching an tam telh telh tih sawiin, MAMSol-in Sawhthing an leite chu Asssam, Kolkota leh Tripura atangte an rawn leichhawn thin thu a sawi a. “Mizoram Sawhthing te hi a tha hle a, India ramah Sikkim, Meghalaya te nen Sawhthing nei tha ber kan ni,” tiin, Aizawl, Champhai leh Serchhip District te chu Mizoram District hrang hrang zinga Sawhthing tharchhuak hnem an nih thu leh Chawngtlai, Khanpui leh Rangvamual-ah te Packing House-cum-Collection Centre bakah Bairabi-ah Processing Unit din an tum mek thu a sawi bawk.

MAMSol-in Mizoram-a Sawhthing an lei hmasak ber kum 2017-ah kg. ah Rs. 30-in kg. 1,50,000 an lei a, kum 2018-ah kg. ah Rs. 45-in kg. 12,12,000 leiin, kum 2019-ah kg. ah Rs. 65-in kg. 1,93,000 an lei leh a. Kumin 2020 chhung khan kg. ah Rs. 65-in kg. 5,61,000 an lei tawh a, COVID-19 hri leng vanga lockdown neih a nih, kumin April atanga June thla chhung khan Mizoram khaw hrang hrang 14 atangin kg. 4,60,485 an lei a ni.

Kum 2017 atanga kumin thlenga MAMSol in Sawhthing an lei tawh hi kg. 21,16,000 (qtls. 21,160) a tling tawh a. MAMSOL hian Sawhthing an leina man chu pawisa faiin an pe nghal zel a, kumin bika Sawhthing an leisak tam zual khuate chu - Chawngtlai (kg. 2,14,074), Sialhawk (kg. 61,000) Farkawn (kg. 28,000) Vaphai (kg. 20,000) te an ni. MAMSol Managing Director chuan December emaw January thla tir vel atangin Sawhthing an lei leh tan dawn tih a sawi a. Sawhthing an leite chu a fai tha tawk lo thin tih pawh sawiin, hemi chungchang inzirtirna hi khaw hrang hrangah an nei thin tih a sawi bawk.