AAI ten CSR Fund atangin Bus pahnih an pe

Airport Authority of India (AAI) chuan Corporate Social Responsibility (CSR) hnuaiah Air Conditioned Bus pahnih chu Mizoram sawrkar hnenah an pe a, Thingdawl Nursing School a hman tura ruahman a ni.

Heng Bus hlanna puala inkhawm tawi Inrinni zing-a neih ah Chief Minister, Zoramthanga chuan AAI chungah lawmthu sawiin, an thilpek chu a hmangtu tur ten an tangkaipui hle a rin thu a sawi a. Airport tichangtlung turin AAI nen Mizoram sawrkar chu thawhhona tha neih chhunzawm zel pawimawh a tih thu sawiin, Mizoram chu tlangram anih avangin inkalpawhna lama hmasawnna ruhrel hrang hrang tha neih a pawimawh thu leh, kawng bakah thlawhna hmanga inkalpawhna tihhmasawn a tul thu a sawi bawk.

He hunah hian Health Minister, Dr. R. Lalthangliana pawhin AAI ten an Corporate Social Responsibility Scheme hnuaia bus pahnih lai an rawn pe chu lawmawm a tih thu sawiin, Thingdawl Nursing School mamawh tak a nih thu a sawi bawk a. AAI DGM, CNS & Airport Incharge, Aloke Gupta pawhin he ni hi AAI tan chuan ni chhinchhiah tlak tak a nih thu sawiin, vantlang rawngbawl theia an awm chu lawmawm a tih thu a sawi a. Mizoram sawrkar nen hun rei tak thawhhona tha tak an la neih zui zel a beisei thu a sawi bawk.

AAI ten Mizoram sawrkar hnena Bus pahnih an hlan hi Thingdawl Nursing School a hman tura ruahman niin Chief Minister hian Health & Family Welfare Minister, Dr. R. Lalthangliana hnenah a hlanchhawng leh nghal a ni.