Hunpui laiin COVID laka invenna tura ruahmanna siam te zawm theuh turin ngen

Home Minister, Lalchamliana chuan kan hma lawka Krismas leh Kumthar hi hlim leh lawm taka hmang theuh tura Mizoram mipuite duhsakna chibai bukin, sawrkarin COVID laka invenna tura ruahmanna a siam te zawm theuh turin mipuite a ngen bawk.

Krismas leh Kumthar lo thleng tur puala mipuite hnena thuchah a tihchhuah ah Home Minister, Lalchamliana chuan kumin hian kumdang angin Krismas leh Kumthar boruak a awm theilo tih sawiin, khawvel leh Mizoram mipuite COVID-in min tibuai nasa em em tih a sawi a. He COVID natna avang hian a chang chuan Dawr te pawh hawng thei lovin, a chang chuan nitin eichawp zawng te pawhin hna an thawk thei lo tih a sawi a. Amaherawhchu, tunah chuan Dawr hawn te phal a nih tawh avangin Dawr-a thil leitute leh dawr hawngtute an fimkhur lehzual a ngai tih a sawi a. Sawrkar-in COVID laka invenna tura a siam, Standard Operating Procedure chu zawm theuh tura mipuite ngenin, “Hetiang hun pawimawh karah hian thiantha te nen intihlima khawlaia thiltih khawm te kan chak viau mai thei. Hetah hian kan fimkhur a ngai zual a. Hlimna aiin nunna a pawimawh a ni tih hi i hrereng ang u,” a ti.

Kumdang ang bawkin sawrkarin hetiang hun pawimawh karah hian Halpuah te, Halmawi te leh Halthlawh te a khap leh tih pawh sawiin Home Minister chuan, hei hi zawm theuh turin mitin te a ngen a, heng hal chi te hian kan boruak hip tur a tichhe thei a, COVID te pawh a tihluar thei bawk nia sawi a nih thu sawiin, hei vang hian heng hi ti lo turin mitin a ngen bawk.

Home Minister chuan COVID kan dona kawngah leh Krismas leh Kumthar hlim leh lawm taka kan hman theuh theihna tura boruak tha siam turin Police te, VLTF te, Local Task Force te leh chutianga rim taka thawktute chu thu zawm turin mipuite a ngen a, khawpui-ah chuan a tul ang zelin Police duty te pawh an indah belh ang tih a sawi a. Mask vuah chungchang ah mipui ten an vuah tha hle-a a hriat thu leh fakawm a tih thu sawiin, amaherawhchu Social Distancing erawh zawm har kan ti thung niin a sawi a. “Kan awmkhawm leh tual tual thin. Hei pawh hi hrerengin, zawm i tum ang u. Mithiamte duhdan chuan meter 2 kar danah mihring hi kan awm tur a ni tih a nih kha. Hei hi hre thar turin mitin ka chah duh a ni,” a ti bawk.