Chanchin thar thenkhat :

ZLP in pawi tih thu sawi

ZPM Legislature Party (ZLP) chuan November ni 27, 2020 (Zirtawpni)-a Assembly Speaker, Lalrinliana Sailo-in an Leader, Lal-duhoma MLA chu Anti-Defection dan hmanga a disqualify ta mai chu pawi an tih thu an sawi a. Assembly Session-ah Mizoram mipuite tana thudik hriattir leh sawrkar khalh ngilna atana pawimawh taka hma lo la thin tu chu Anti-Defection dan siam a nih chhan, mahni vote tute phatsan avanga hremna a chunga lek a ni ta zawk hlauh chuan Mizoram mipuite leh a thlangtlingtute rilru a tina takzet nia sawiin, “Mahni thlangtlingtu te bula awm a, an tana hmala te hi, Anti-Defection danin paih bo a tum phatsantu (defectors) an ni thei ngai lovang,” an ti. ZLP chuan Zoram-thanga kaihhruai sawrkar chu an hnathawhnaah Dan ngai pawimawh zawk tur leh mipuite hlawkpui theih tur thil buaipui tawh tura an ngen thu an sawi bawk.

Group YMA kum 25-na lawm

Sialkal Group YMA Silver Jubilee lawmna chu nimin khan Mimbung-ah neih a ni a, he hun hi Sialkal Range Development Council-a Development Officer (DO), Ngulzathuama MCS chuan a hmanpui a ni. Salkal Group YMA Silver Jubilee lawmna hi hri leng avanga mipui pung-khawm tamlo zawnga neih niin an Group huam-chhung khaw 6 atangin ruatbik te an tel a, he huna khuallian chuan YMA chu Zirna lam kum-puan neitu a nih avangin thahnem ngai taka an khua theuhah Hripui leng karah pawh a theih dan dang kawng a tan la turin he huna kalkhawm YMA hruaitute chu a chah a ni.

Chairman atan Dr. Thangtea

YMCA North East Region Virtual Regional Election Meeting chu nimin khan Health Minister, Dr. R. Lalthangliana hovin a Office Chamber-ah neih a ni a, he hunah hian kum 2020 thlenga YMCA North East Regional Chairman atan Dr. R. Lalthangliana chu lakluh niin a ho hian Executive Meeting hmasa ber neih nghal a ni bawk.

Mizoram hmalakna fak

BJP National Spokesperson leh BJP Mizo-ram Pradesh bialtu ni bawk, M. Kikon chuan nimin khan Aizawl Press Club-ah thuthar thehdarhtute kawmin Mizoram-a COVID-19 hripui dona kawng ah mipuite tanrualna avangin, Mizoram chuan a titha takzet tih a sawi a. COVID-19 dona kawng ah hian Health Minister, Dr. R. Lalthangliana leh Chief Secretary leh Officer te hmalakna chhuan-awm a tih thu a sawi bawk. Hei bakah hian M. Kikon chuan Constitution Amendment 125-na Bill Parliament-a putluh tak chu pass anih hunah Finance Commission hnenah Autonomous District Council te Direct-a Fund pek theihna thuneihna pek an ni dawn tih sawiin, he Bill hi Parliamentary Standing Committee ten an zir chiang mek tih a sawi bawk.

ZPM Thalai ten tlawh

ZPM Thalaite chuan nimin khan Aizawl North-II bialtu MLA, Dr. Vanlalthlana hovin Aizawl khawpui bawlhhlawh sawngbawlna, Solid Waste Management Centre, Tuirial chu an tlawh a, tunlai thiamna hmanga kan hnawm leh ningnawite thil tangkai leh hralh sum a chang thei tura hmalak chhoh tan a nih thu thawktuten an lo hrilh tih an sawi a. Tawih thei lo thliar dan tur mipuite tana kaihhruaina siamah Plastic leh plastic lo zawng thliar hrang tura tih a nih laiin bawlhhlawh paihna hmun-ah erawh tawih thei lo ho chu hmun khata bun khawm vek a ni tih an sawi a, hei vang hian tawih thei leh tawih theilo paih ni siam leh a paihna pawh mumal zawka kalpui theih a nih tur thu an sawi bawk.

Inkhuahkhirha thar hmang

Mizoram-a hri leng avanga inkhuahkhirhna hman, COVID-19 No Tolerance Drive chu Vawiin, Dec. 1, 2020 atang hian kalpui chhunzawm a ni leh dawn a, kumthar January 10 thleng inkhuahkhirhna hi kalpui a ni ang. Inkhuahkhirhna hi Hunpui chhung pawha kalpui tur niin, Sakhaw biakna hmunah mipui punkhawmna huaihawt phal ni lovin Krismas leh kumthar hunpui laiin Sawrkar programme pawimawh bik tih loh mipui hip thei programme rêng rêng huaihawt khap a ni dawn a ni.