Latest News

Dr. R. Lalthangliana’n Kawrpuichhuah a tlawh

Commerce and Industries changtu Minister Dr. R. Lalthangliana chuan Bangladesh leh Mizoram insumdawn tawnna atana ruahman, Integrated Check Post (ICP), Kawrpuichhuah, Tlabung chu nimin khan a tlawh.

Minister hi Sawrkar Laipui-a Ministry of Home Affairs hnuaia Land Ports Authority of India (LPAI) Director (Project) Col. Raman Kumar Sharma leh Assistant Commissioner, Customs Neetisha Verma te bakah Cmmerce and Industries Department-a Officer ten an tawiawm a, Minister leh amah zuitute hian ICP Trade Centre hmun Kawrpuichhuah Tlabung-a ruahmanna kal mek ngun takin an enfiah a. Kawrpuichhuah a hmalakna chu a rang thei ang bera tih hlawhtlin anih theihnan Sawrkar Laipui Ministry of Home Affairs hnuaia sumdawnna hmun Trade Centre dintu leh enkawltu LPAI hotute nen ruahmanna an siamho a ni.

ICP Kawrpuichhuah dinna tur hian kum 2005 khan M/s Rites Ltd. ten Home Ministry hnenah an survey report thehlutin he ICP dinna tur hian ram 224.99 bigha a zau lak a ni a. India leh Bangladesh inkal-pawhna ti awlsam tur hian Kawrpui lui (Theka)-ah RCC Double Lane Bridge siam tum a ni bawk a. He RCC Bridge siamna tur hian Mizoram PWD chuan Sawrkar Laipui Ministry of External Affairs ah cheng vbc. 230.01 hu DPR chu January 17, 2020 khan anlo thehlut tawh a ni. He RCC Double Lane Bridge hmang hian awlsam zawkin Indo-Bangaldesh insumdawntawnna kalpui theih a ni dawn a, sawrkar laipui-ah bawhzui mek a ni. Tlabung leh Kawrpuichhuah inkar kawng KM 18-a thui chu laih zawh a ni tawh bawk a ni.

Bangladesh nena insumdawntawn nana thil pawimawh zinga pakhat Trade Facilitation Centre chu Tlabung-ah sak zawh tawh a ni a, hemi sakna atan hian Mizoram sawrkar ngenna angin Critical Infrastructure Balance (CIB) Scheme hnuai atangin cheng nuai 118 chu sawrkar laipui-a Ministry of Commerce & Industry atanga hmuh a ni a. Tunah hian he building a taka hman theihna tur hian Mizoram sawrkarin hma la in cheng nuai 10 hmangin a chhunga hmanrua tur te lei khawm a thuamthat a ni tawh bawk. 

Sawrkar thuchhuah tarlan danin ICP Kawrpuichhuah hi a puitlin hunah chuan Bangladesh ram nena insumdawn tawnna hmun pawimawh a ni chho dawn a,mumal taka bungrua thawnchhuah leh lakluh (Export & Import) chhinchhiah a ni dawn a, chutihrual chuan ramdang atanga Dan lo anga mihring lut turte pawh uluk takin ICP-ah hian endik a ni dawn a ni. He ICP puitlinna tura pawimawh tak Lunglei leh Tlabung inkar ah kawngpui (Double Lane) KM 100 chu survey zawh tawh niin kawngpui tha takin Tlabung hi a pawh dawn a ni.

Comments

Chhiar Hlawhte