Cheng nuai 3,443 chuang senna tur lungphum phum

Chief Minister, Zoramthanga chuan nimin khan West Phaileng-ah Sports hmasawnna ruhrel cheng nuai 3,443 chuang man dinna tur lungphum a phum.

Sports & Youth Services Department kaltlanga Ministry of Minority Affairs hnuaia Pradhan Mantri Jan Vikas Karyakram (PMJVK) atanga sum hmuh hmanga Residential Sports School, Community Centre leh Smart Classroom dinna tura lungphum phumna hunah hian Chief Minister, Zoramthanga chuan khawthlang lam chu thei leh thlai that duhna hmun, hmasawn tura theihna nei tha tak a nih thu leh tunah infiamna lamah te hmasawn belhna tur chhawp theih a ni ta zel chu a lawmpui thu a sawi a. Mizoram-in kawng hrang hrangah hmasawn theihna, opportunity a neih thu leh a chhunga cheng mihring ten kan ngaihtuahna kan herrem thiam chuan kan thenawm State te tana entawntlak hmasawnna kawng hrang hrangah kan lantir theih thu a sawi bawk.

He hunah hian Sports & Youth Services Minister, Robert Romawia Royte chuan heng lungphum phum tak te hi West Phaileng khua mai bakah chhehvel khua te pawhin tangkai taka an chhawr ngei a beisei thu a sawi a. Heng project-te hi a nihna tur ang taka zawhfel a nih theih nan tualchhung mipui te pawhin lo enpui a, a sak hna thawktute lo thawhpui turin a chah bawk. He hunah hian Dampa Bialtu MLA, Deputy Govt. Chief Whip Lalrintluanga Sailo pawhin Bial mipuite tana tangkai leh chhenfakawm tak tur hmalakna thar din a ni tur chu lawmawm a tih thu a sawi bawk.

Nimin-a lungphum phum tak PMJVK project pathumte hi cheng nuai 3,286.34 man Residential Sports School te, cheng nuai 140 man Community Centre (Sadbhav Mandap) leh cheng nuai 17.54 man Smart Classroom te a ni a. Residential Sports School-ah hian Academic building bakah mipa leh hmeichhe Hostel naupang 100 ve ve awm theihna tur te, Multipurpose Hall, Astro Football Turf, Principal leh Staff quarters te, Basketball leh Volleyball Court te leh RCC tuizem lian te awm tura ruahman a ni.

Community Service Centre tur hi RCC building, chhawng hnih a sak tur a ni a. Basement Floor-ah Computer Room, Library, Office leh Committee Room-te dah in, Ground Floor-ah chu Main Hall atan hman tur niin, Badminton leh Indoor Game hrang hrang atana hman theih tur a nih bakah NGO te leh khawtlangin inhmuhkhawmna atan leh Function hrang hrang neihna hmun atana ruahman a ni a. Smart Classroom hi School thlanbikah zirlai ten tunlai thiamna (Internet Technology) hmanga lehkha an zir theihna tur atan ruahman niin, internet thlun zawmin Computer, Printer, Television (TV) te dah tur a ni bawk.