Chanchin thar thenkhat :

Deputy CM in tlangzarh

Mizoram Civil Service Association (MC-SA) Official Magazine, ‘RAHBI’ leh Profile Booklet chu nimin khan Deputy Chief Minister, Tawnluia chuan Aizawl-a SAD Conference Hall ah a tlangzarh a, heng tlangzarhna puala inkhawm ah hian Deputy Chief Minister chuan MCS Officer te chu kan ram inrelbawlna a Administration kengkawh tu an ni tih sawiin, an hnathawh that leh that lohin ram inrelbawlna thui tak a nghawng tih a sawi a, COVID-19 Hripui leng karah MCS Officer ten Sawrkar inrelbawlna kawng hrang hranga an tha thawh danah sawrkar a lawm tih a sawi a. Hun engemaw chen tihtawp lailawk Combined Civil Service Exam chu Sawrkar in Rules thar, Mizoram Civil Services (Combined Competitive Examination) Rules,2020 chu May thla khan a siam thar leh tih a sawi bawk.

Pollution Test-na din tum

Transport Department chuan lirthei tana Pollution Test-na hmun la awm lohna District khawpui paruk - Siaha, Lawngtlai, Serchhip, Cham-phai, Kolasib leh Mamit-ah te Pollution Testing Centre dah theih turin heng District hrang hranga Staff te tan hian nimin khan Directorate Office-ah training an buatsaih a. Tun dinhmunah hian Mizoram Pollution Control Board (MPCB) chuan Aizawl leh Lunglei-ah lirthei atanga boruak chhuak tehna hna a kalpui mek a. Test-na hmun awm ve lohna District khawpuiah te lirthei neitu te awlsam zawkna atan Transport Department-in District Transport Office-ah te test hi a kalpui dawn a ni.

Self-Support Award hlan

Students’ Self-Support Union (SSU) General Hqrs. chuan kumtin-a an lo tih tawh thin angin Zirlai ni chunga mahni intodelh thlanchhuah zirlai pathum hnenah nizan hmasa khan ‘Self-Support Award’ an hlan a, Award dawngtute hi Lalrinawma, Ngopa te; Malsawmhlui, Ramhlun Sports Complex leh VL. Malsawmtluanga, Aizawl te an ni.