Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

COVID-19 vanga hna chân tan MYC in ruahmanna siam

Mizoram Youth Commission (MYC) chuan Mizoram mi leh sa, State pawna hnathawka awm COVID-19 vanga lo kir te tan anmahni chawmdawlna tur chi hrang hrang a siam.

MYC chhinchhiah danin COVID-19 vanga hmundanga hnathawk lo kir (migrant workers) hi 2637 an awm a. Heng mite chhawmdawl nan hian Nort Eastern Council (NEC) ah project an siam a, NEC hian tunhnai khan an project atangin cheng vbc. 3 a rawn pawm a, he sum hmang hian eizawnna atana an thiamthil te training na tur an ruahman a. MYC hian skill training atan vbc. 3 an dil leh a, he pawisa pawh hi NEC chuan pek leh an tum a ni.

Planning-a Commissioner Dr. C. Vanlalramsanga chuan sawrkar laipui chhinchhiah danin COVID-19 vangin India ram hmun hrang hrangah an hnathawhna atanga ban mi vbc. 1.4 an awm a. Mizoram mi leh sa, State danga hnathawk, let duh let thei lo an awm sawrkarin a hre lo tih a sawi a. State pawna hnathawk lolet te record felfai tak hi MYC chu a kawl niin a sawi bawk. Dr. C.Vanlalramsanga chuan state pawna hnathawk, Mizoram a lolet te tan Livelihood Generation for Returned Migrant Workers due to COVID-19 hnuaiah eizaawnna tana thiamna mamawh inpekna (skill training), a taka thawk thei tura exposure pekna (internship programme), hnathawhna tur infrastructre ruahman leh kaihhruaina tha taka thawk tura ruahman pui te a tel a ni, a ti. Sawrkar ruahmanna chi 7 te chu heng te hi niin thla 8 chhunga zawh hman tura beisei a ni-

1) District tina kalpui tur Entrepreneurship Development programme. Mahni kutke a thluak themthiamna hmanga eizawnna tih hmasawnna lam hawi niin mi 550 vel he hamthatna chhawr thei tur hi awm tura beisei a ni.

2) LESDE in an buatsaih tur Skill Training. Mi 150 target an ni a, hna rum deuh hlek thawk thei tura ngaihte tana ruahman a ni.

3) Mizoram University Incubation Centre nen tangkawpin Internship cum Entrepreneurship Skills training neih a ni ang a, anmahni kuke ngeia an din theih nana thiamna chher chhuahna tura ruahmanna niin, mi 100 target a ni.

4) Entrepreneurship and Skill training for Home based food processing, Mizoram Food Processing, Research and Training Centre-a kalpui tur. Mi 120 target a ni.

5) BPO, Animation, Gaming, Design leh thil danga thawkte hi migrant worker zingah an tam avangin infrastructure a hranpa tawp a dinna atan cheng nuai 17.5 dah a ni a. Hemi hian mi 637-in hemi behchhan hian eizawnna an neih theih rin a ni.

6) Tourism department hnuaiah Tour Guide ni tura training pek tum a ni a, mi 100 target a ni.

7) Mahni inlum atanga sumdawnna E-commerce.

Comments

Chhiar Hlawhte