Adult Rehabilitation Centre (ARC), Chhiahtlang kum 10 tlin lawmna I&PR Minister in a hmanpui

Salvation Army enkawl, Adult Rehabilitation Centre (ARC), Chhiahtlang in kum 10 an tlin lawmna chu nimin khan neih a ni a, I&PR Minister Lalruatkima chuan a hmanpui a ni.

ARC Dormitory, Chhiahtlang-a ARC kum 10 tlin lawmna ah hian I&PR Minister chuan ARC in tluang taka a kum sawm cham a thleng thei leh hma lam pan zela a kal chu lawmawm a tih thu sawiin, “Kan ram, kan hnam leh kan chhungkua theuh damna hi thil pawimawh hmasa, ka rilru a cham reng thin a ni,” a ti a. Hetiang Centre enkawl hi thil namailo tak, dawhtheihna, hmangaihna leh Pathian tihna nena thawh ngai a ni tih sawiin, chutiang hna ropui hlawhtling taka ARC in a thawk chu ram tan pawh a hlu a, Salvation Army dintu William Booth-a kawhhmuh kawngah dik takin an kal zel a ni tih a chiang hle a, khawvela hna ropui ber te zinga mi in thawk a ni, tiin an Centre panna kawng siamthat an mamawh thu  an lo thlen chu a tul anga bawhzui a nih tur thu a sawi bawk.

He hun kaihruaitu Maj. Moses Sairengpuia Sailo chuan ARC in kum sawm a tlin champha lawm hun hi COVID-19 vangin vawi tam tak an sawn thu leh a taka an hmang thei ta chu lawmawm an tih thu sawiin, an beisei anga Minister in a hmanpui thei chu an lawm hle tih a sawi a. He hunah hian Capt. Anthony C. Lalruatfela, Superintendent, ARC, Chhiahtlang in ARC dinhmun tlangpui tarlangin, he Centre-a awm tawh aiawh Zothlamuana'n thu a sawi bawk a ni.

Salvation Army chuan he ARC hi ruihhlo chi hrang hrang leh mipat hmeichhiatna lama nunkawng rap tleu tawhte enkawlna hmun atana August ni 22, 2010 khan dahngheh a ni a. He Centre innghahna Pathian thu chu, ‘Chutichuan heng pathum, rinna te, beiseina te, hmangaihna te a awm reng ang; tin, heng ah te hian a ropui ber chu hmangaihna hi a ni’ (I Kor. 13:13) tih a ni. Kohhran, pawl leh hnam thliar lovin a mamawh apiangte enkawlna a ni a, an harsatna atanga an talchhuah theihna tura kawng tinrenga hmangaih taka enkawl an nih bakah eizawnna tur thiamthil te pawh zirtir an ni a. Tunah hian thawktu pasarih an awm mek a. An hmunhmate a la tet deuh avangin a rualin mi 10 chauh an enkawl thei a, Dormitory lian zawk sak mek a ni bawk.