Chief Minister in Aizawl-ah Innovation Facility Centre a hawng

Mizoram-a tualchher thiamna nei (Local Innovator) te leh Technical lam zirna hmuna zirlaite tana an khawl mamawh chhawpchhuahsak leh innovation lama hmasawnna tur atana tan lakna tura ruahman, Innovation Facility Centre (IFC) chu nimin khan Chief Minister, Zoramthanga chuan Mizoram New Capital Complex-ah a hawng.

Mizoram Science, Technology & Innovation Council (MISTIC) Project pakhat ‘Development of Indigenous Technological Development in Mizoram through Establishment of Innovation Facility Centre and Enhanced Protection of Ownership’ hnuaia din Innovation Facility Centre (IFC) hawnna hunah hian Chief Minister chuan thil thar zawnchhuah leh ngaihtuahchhuahna tur hmun hawn a ni chu lawmawm a tih thu a sawi a. Thufing-in ‘Mamawhna chu thil thar hmuchhuahna’ tia a lo sawi chu Vawiin thleng pawha a la dik thu sawiin, Mizoram in hma a sawn zelna ah mamawh thar hrang hrang a la awm chho ngei ang a, chungah chuan kan innovator ten an ngaihtuahna seng a thil thar tha tak tak an siamchhuah zel a beisei thu leh, chung atan chuan IFC hawn tak chu pawimawh tak tura a rin thu a sawi bawk.

Innovation Facility Centre din thar tak Project cost chu cheng vbc. 6.67 niin Innovation lama hmasawn zelna tur atanga kawng siam te, thil siamchhuaktu ten an thil siamchhuah neitu nihna an hum theihna (patent) kawnga hmalak pui te chu IFC tum zingah a tel a. He project atan hian a tirah Implementation Committee on Development of Indigenous Technological Innovation in Mizoram din niin tunah hian IFC enkawl tur hian Management Committee mumal tak din tura hmalak mek a ni a, he Centre hi a theih chen chenah mahni intungnung tura ruahman a ni.

IFC building-ah hian chhawng thum awmin MISTIC Work Advisory Committee kaltlangin L.B. Associates chu a sa tura thlan an ni a, February ni 8, 2018-ah lungphum phumin February 9, 2018-ah sak tan a ni a, March ni 5, 2020-ah sak zawh a ni. IFC-ah hian khawl (Machine) chi hrang hrang leh Electronic equipment 21 a awm a, thir lam chi kaihhnawiha hna chi hrang hrang thawk thei tur khawl pawimawh zual chu a awm kim thawkhat a. Digital/electronic hmanraw lam, thil san zawng te, boruak lum leh vawh lamte, boruak hnawn zawng te, thiltui lam chi samuk zawng te, etc. teh thei khawl chi hrang hrang a awm bawk.