Chanchin thar thenkhat :

Rubber sawngbawlna vailiam

Lunglei District chhung khaw 5- Lungsen, Zawlpui, Bolia Veng, Bunghmun leh Marpara South khuaa Rubber chingtu chhungkaw 40 te hnenah Rubber an sawngbawlna tur khawl leh hmanraw dangte, Rubber Rolling Machine & Accessories Unit 11 chu nimin khan HPC Vice Chairman, Lawmawma Tochhawng chuan Lunglei atangin a vailiam a, MIRSAC Data record atanga a lan danin Lunglei District chhungah hian rubber chin theihna tur Hacter nuai 1.6 a zau awmin tunah hian Rubber chinna hmun hi Hectare 500 vel a ni.

Hri kai 32 hmuh belh an ni

Niminpiah khan Mizoram-ah COVID-19 hri kai mi 32 hmuh belh leh an ni a, an zingah hian tualchhung-a hri inkaichhawng pawh an awm leh nual a ni. Niminpiah khan ZMC Laboratory-ah Sample 565 enfiah niin hri kai mi 11 hmuh-chhuah an ni a, District hrang hranga TrueNat Laboratory-a Sample enfiah 224 atangin hri kai mi 7 hmuhchhuah niin Rapid Antigen Test hmanga Sample enfiah 763 atangin hri kai mi 14 hmuhchhuah an ni bawk. Nimin khan Mizoram a COVID-19 hri kai mi 7 te chu anmahni enkawlna hmun atanga chhuahtir an ni a, heti hian nimin tlai dar 5:00 thleng khan Mizoram-a hri kai hmuhchhuah chu 3968 niin 3764 te chu en-kawl dam an ni tawh a, hri kai enkawllai 198 la awmin nunna chan 6 an awm tawh bawk a ni.

Synod Inkhawmpui nei tan

Mizoram-a Presbyterian Kohhran rorelna sang ber, Synod Inkhawmpui vawi 97-na chu nimin atang khan Dawrpui Kohhran Biak In-ah tan a ni a, Hripui leng avanga Palai kal thei 2350 atangin mi 300 chauh tel phalsak an nih avangin Synod Inkhawmpui neih tawh zawng zawnga palai an tlem ber tum a ni dawn a, Palai 250 vel tel tura beisei an ni. Tun tuma Synod Inkhawmpui hi pawhtawi niin Zirtawpni zan-ah Pastor leh Pro. Pastor dahnghehna hun hmangin zawhfel a ni dawn a ni.

MPCC in Dan dodalna thlawp

Mizoram Pradesh Congress Committee (MP-CC) chuan India ramin a buaipui mek, The Farmers’ Produce Trade and Commerce (Promotion and Facilitation) Act, 2020 leh Act dangte chu loneitute tana him taw lo a ngaiin ram pum huapin Indian National Congress (INC) chuan dodalna nasa takin a lantir mek tih sawiin, he Dan thar hian loneitu, mi rethei zawkte chu mi hausa leh sumdawng lian zawkte laka an tlukluh theihna tur kawng hawngtu a nih avangin tha an tilo tih an sawi a. He Dan hi hman a nih lohna tura theihtawp chhuah turin Mizoram mipuite chu an sawm bawk.

Board thutkhawm nei

Commerce & Industrial Development Board chu nimin khan SAD Conference Hall-ah an Chairman, Commerce & Industries Minister, Dr. R. Lalthangliana hovin an thukhawm a, he hunah hian The Mizoram Industrial Policy 2020 (Draft) chungchang sawiho niin Board Meeting hmasa zawkah pawm a nih tawh angin a chhunzawm zel dan tur chu official-te kutah dah a ni a, Board hnuaia Drafting Committee in a rang lamin Official-te kutah an hlan ang. He hunah hian an Department hnuaia beneficiary thlan chungchang pawh sawiho a ni bawk.