'Panhnah Intodelh Programme'

Agriculture Minister, C. Lalrinsanga chuan nimin khan West Lungdar-a kuthnathawktu ten Kaihlet Zau-a thlai leh thei an chin te a hmun tlawhin, Kaihlet Zau Society te buatsaih 'Panhnah Intodelh Programme' a hmanpui nghal bawk.

Kaihlet Zaua 'Panhnah Intodelh Programme' ah hian Agriculture Minister chuan Mizo mipuite sum luanral tamna ber chu kan tharchhuah ve theih si, tharchhuah kan tum lem loh, nitina kan mamawh (essential commodities) lei nan a ni tih sawiin, hei hi ngaihven lehzual a ngai a, kuthnathawktute pawhin kan State chhung mamawh zualpui phuru thei tur tal chuan tan an lak a ngai nasa hle, a ti.

Pahnah pawh Kuhva kan ei nasat avangin kan nitin mamawh zingah engemaw ti kawng zawnga a tel ve thu sawiin Agriculture Minister chuan, “Sum tam tak sengin phai lam atanga lakluh a ni a, Panhnah kan mamawh atanga 99% vel hi phai atanga lakluh a ni mek a. Kan ti ta sa sa a nih chuan W. Lungdar khua chu Mizoram in Panhnah avanga an hriat lar ni thei turin tan an la thei a ni,” a ti a. Kaihlet Zau panna kawng pawh kuthnathawktute tanlakna in a nawr nasat viau phei chuan tha zawka siam a ni ang, a ti bawk.

Kaihlet Zau hi W. Lungdar khua atangin KM 3 vela hla a awm niin chhungkaw 60 bawr velin huan thlai leh thei chi hrang hrang - Kuhva, Balhla, Serthlum, Panhnah leh a dangte chingin hma an la mek a. Heng kuthnathawktute hi Kaihlet Zau Society, West Lungdar hnuaiah intel-khawmin sawrkar puihna leh anmahni remhriatna anga hma lain an huan thlai te hi sum-ah an chantir thin a ni. Heng an thlai chin zingah hian Panhnah atang hian sum an lalut hnem ber a, KZS-ah hian chhungkaw 35 in Panhnah chingin Panhnah kung 8555 enkawl mek niin kumin November thla thleng khan qtls. 136.8 an tharchhuak tawh a ni.