Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

Chanchin thar thenkhat :

AMC inthlan hun tur hriatloh

Aizawl Municipal Corporation (AMC) a Councillor thlanna chu kumin-ah neih theih a ni dawn lova, inthlan hun tur pawh hriat ala ni lo. Hemi chungchangah hian SEC hotute chuan hri pui leng mek ngaihchan a nih avangin kumin ah chuan AMC inthlan hi neih a ni dawn lo tih an sawi a. SEC Secretary, Teresy Vanlalhruaii chuan, “Tun dinhmunah inthlan buatsaih ngamna chi-ah kan ngai lova, inthlan hun tur chu boruak awm dan azirin la ngaihtuah leh a ni ang,” a ti a. AMC term chu tawp mah se, sawrkar in an aiawha roreltu tur a ruat thei niin a sawi bawk. Tuna AMC term ding mek hi tunkar Ningani (December 10, 2020) hian a tawp dawn a ni. Hetihlai hian AMC inthlan lo awm turah hian Polling Station 48 siam belh a ni dawn a, Local Council inthlana Polling Station 226 awm chu AMC inthlanah 48 siam belhin 274 a awm tawh dawn a ni.


LADC-ah Vote thlak zofel

Lai Autonomous District Council (LADC) Seat 25-a inthlanna neih a Vote thlak chu zawh-fel a ni ta a, he inthlanna a Vote tla te hi naktuk ah Lawngtlai-ah chhiar a ni ang. LADC inthlanna ah hian vote nei 51,456 awm ah vote 43,060 a tla a, hei bak ah hian Postal Ballot a vote tla 802 a awm tawh a, Postal Ballot hmanga vote thlak dil 851 awmin, mi 49 te Postal Ballot chu ngaih-chan mek a ni a, he inthlanna a Vote tla hi 85.24% a ni. He inthlanna ah hian EVM hman niin Polling Station 111-a EVM hman te chuan Inrinni zing khan Lawngtlai a thleng kim tawh a, venhimna hnuaiah dahin naktuk-ah chhiar a ni dawn a ni.


Hnahthial-ah Office hawng

School Education Minister, Lalchhandama Ralte chuan Inrinni khan Hnahthial-ah District Education Office leh District Project Office, Samgra Shiksha, Hnahthial District te a hawng a, School Education Minister chuan ram hmasawnna chu zirna ah a innghat tih sawiin, Hnahthial District chuan zirna kawnga hmasawnna an nei theihna hmanraw tangkai tak ni tura a duh thu a sawi a ni.


ZORO nen inkawmna nei

ZORO General Hqrs. hruaitute leh Thangram Indigenous Peoples Movement hruaitute chuan Inrinni khan Aizawl-a ZORO Office-ah inkawmkhawmna an nei a, he hunah hian ZORO President, R. Sangkawia chuan ZORO in a tum ber chu khawvel hmun hrang hrang a awm Zofate inlung-rual leh inpumkhat a kan awm theih nan leh Zofate luahchin ram rorelna pakhat hnuaia awm a ni tih a sawi a, UNO atangin Zofate luah chin Map siam tura an tih angin Zoram Map an siam tawh thu leh an thehluh tawh thu a sawi bawk.


SHG tan training buatsaih

Kar kalta Ningani leh Zirtawpni khan Ser-chhip District chhunga Chhingchhip khua ah Startup Village Entrepreneurship Project (SVEP) Mentor leh Project Facilitator te chuan Self Help Group (SHG) pahnih awm te tan Skills Training on Food Processing an buatsaih a, he hunah hian Cake siam dan leh India ram hmun thenkhat-a an chaw siam dan te an zirtir a ni. SVEP Project hi thingtlang-a SHG member harsa zawk ten eizawnna mumal an neih theih nana puihna a ni.

Comments

Chhiar Hlawhte