Ganja Kg. 50 chuang man

Serchhip Police te chuan Zirtawpni zan khan Lunglei lama kal tur nia insawi Truck pakhat atangin Ganja kg. 50 chuang an man a, he motor enkawltute pawh man nghal a ni.

Mizoram Police DIG (Eastern Range) leh Serchhip SP in ruahmanna an siam angin Serchhip Police te hian tunlai hian Krismas vuakvet atana inbuat-saihna atan Mizoram khawchhak lam atanga lirthei rawn lut te enfiah hna an thawk thin a. He an hmalakna kal mekah hian Zirtawpni zan dar 11:30 vel khan Hnahlan lam atanga Truck rawn kal pakhat, Thingzai phurh kara heng Ganja thuhruk te hi an man ta a ni.

Police te hnen atanga thu kan dawn danin he Motor Mz-04-A/3591 hi Vanlalbiaka (23), Hnahlan Darnam Veng nia inchhal ta niin amah bakah hian Motor khalhtu Lawmsangliana (22), Hnahlan khua, tuna Aizawl Bawngkawn Chhim Veng-a khawsa mek nia inchhal te chuangin man nghal an ni a, heng mite hian heng Ganja te hi Myanmar atanga rawn lut nia an hriat thu leh Vanzau peng-ah mi pahnih in an phurh tir tih sawiin, Police te chuan an chhui zui mek a ni.

Serchhip Police te chuan heng Ganja an man hi a vaiin Kg. 54.926 a nih thu sawiin, Truck in a phurh Thingzai karah hian uluk taka thuhruk a nih thu an sawi a, motor enkawltute chuan Thingzai hi Lunglei lama dah tur a nih thu an sawi bawk. Heng Ganja man chungchangah hian Serchhip Police Station-ah thubuai ziahluh nghal a ni. Heng Ganja an man te hi tualchhung a hralhna ang chuan Rs. 2,75,000/- hu vel nia chhut a ni.