Latest News

WATSAN Committe training

PHE Serchhip WATSAN Division hnuaia WATSAN Committee te tana Training chu nimin khan Serchhip P&E Veng YMA Hall-ah neih leha zawhfel a ni a, he training-ah hian Serchhip Sub-Division huamchhunga WATSAN Committee Member te an tel a ni. Hemi hmalam hian East Lungdar Sub-Division huamchhung ami te tan East Lungdar-ah leh Tlungvel Sub-Division huamchhung ami te tan Tlungvel-ah te neih a ni tawh a ni.

Boruak muanawm hnuaia mipui ten Hunpui an hman theih dan tur SP in NGO te a sawipui

Serchhip District Superintendent of Police, R. Sathiyasundaram IPS chuan nimin khan Serchhip-a tlawmngai pawl hrang hrang hruaitute kawmin kan hma lawka hunpui lo thleng tur boruak muanawm tak hnuaia hman a nih theihna tura hmalak dan tur leh venhimna hna thawh dan tur chungchang a sawipui.

He sawihona Serchhip SP Office Chamber-a neih ah hian Serchhip SP, R. Sathiyasundaram chuan mipui ten Krismas leh kumthar boruak muanawm tak hnuaia an hman theih nana an in buatsaihna hrang hrang sawiin, nikum (2019)-a Police ten Duty Post an lo siam tawhna- Chhiahtlang, New Serchhip, IOC Veng, P&E Veng, Bazar leh Sailiamkawn-ah te Police Duty Post siam a ni leh dawn tih a sawi a, Vawiin (Dec. ni 15) atangin khawlai fankual tan an tum tih sawiin, karleh lam atanga lirthei a khawchhung fankual an tum tih a sawi bawk. Serchhip SP chuan Vawiin, Dec. 15 atangin Serchhip Police ten Anti-Drugs Drive Week an hman tur thu pawh sawiin, hemi hun chhung hian nasa lehzuala ruihhlo dapchhuah kawngah hma an lak dawn thu a sawi a, he an hmalakna avang hian mipui ten Krismas leh kumthar muanawm taka an hman theih phah a ring tih a sawi bawk. Zu man chungchanga ah SP chuan nasa lehzuala tan an lak tur thu sawi bawkin, NGO pawl hrang hrangte chu thawhho puiah a sawm nghal bawk a ni.

He hunah hian Serchhip District Addl. SP, PC. Laltanpuia pawhin kum 2020 Krismas leh kumthar lawmna lo thleng tur chu kumdang ang anih loh thu leh Kohhran Inkhawm Programme leh Krismas ruai siam te a awm dawnloh avangin mipuite chetvel dan tur hriatlawk a har thu a sawi a, hei vang hian Krismas leh kumthar muanawm taka hman anih theih nan leh hripui laka mitin te an him theih nan Dan leh thupek kenkawh chungchang ah tlawmngai pawl te nen thawhhona tha an neih a tul tih a sawi a, Police hmalakna hrang hrang sawiin, ruihhlo chungchangah mipui ten rinhleh an nei anih chuan Police te hriattir vat thin tura ngenin, mipuite thawhho puiah a sawm bawk.

He hunah hian NGO hruaitu atanga kal te atangin Serchhip Sub-Hqrs. YMA President, R. Sanghmingthanga, MUP Serchhip District President, CL. Ramngaia leh MZP Hqrs. President, H. Lallawmkima te chuan thu sawiin, YMA Branch tin te chu an huamchhung theuh ah Duty Post siam tura tih an nih thu leh hripui laka mitin an him theih nan sawrkarin SOP a duan te tha taka zawm anih theih nan hmalak tum a nih thu te an sawi a. Kartawp lam, abikin Pathianni-ah motor a veivaka chhuak an tam thu pawh sawi-lan niin, Motor chak tak tak a tlan an awm thin avang leh mihring tana himlo anih avangin uluk zawka duty inruat rawt a ni a, hei hi thuneitute chuan an lo enzui tur thu sawiin, Dan bawhchhia man kawngah Duty ten rualkhai taka kalpui ni thin se tih rawtna awm pawh theihtawp chhuaha rualkhaia kal a nih rualin an lo inhrilh thar leh tur thu an sawi bawk a ni.

He hunah hian Police hotute chuan kumin a Hunpui lo thleng turah hian sawrkar chuan Halpuah leh halmawi chi hrang hrang bakah a mu kapchhuak thei Silai lem te hman, kawl leh zawrh te a khap tawh thu sawiin, kumin hian kumdang-a la khap ngailoh, Sky Lantern pawh khap a ni tih an sawi a, hetiang lo zuar leh  lo kawl te dapchhuah hna hi an thawk chho mek tih pawh sawiin, Hunpui lo thlen dawna Dan bawhchhiat avanga in man ngai thin chu anmahni tan pawh thil nuam a nih loh avangin mipuite pawhin Dan awm te hi zawm se an duh thu an sawi bawk.

Nimin-a he inkawmhona ah hian Ser-chhip District-a tlawmngai pawl- YMA, MHIP, MUP, MZP leh MSU hruaitute telin hmalakna tur hrang hrang leh thawhhona tha a awm zel theih dan turte sawiho a ni bawk.

Comments

Chhiar Hlawhte