H&TE Minister in hawng

Higher &Technical Education Minister, Dr. R. Lalthangliana chuan Inrinni khan Govt. Mamit College-ah Ratriya Uchchatar Abhyan (RUSA) hnuaia cheng nuai 160 senga sak Library-Cum-Seminar Hall leh cheng nuai 153 senga Academic Building sak te chu a hawng.

Heng building thar hawnna hunah hian H&TE Minister, Dr. R. Lalthangliana chuan Mizoram in hmasawnna hmel a hmuh theih nana ngaihtuahna seng Sawkar a neih avangin Mamit District chhungah hmasawnna hmel hmuh tur awm chho zelin Building tha leh changtlung tak hawn a ni ta chu lawmawm a tih thu a sawi a. Mamit College chu khawpui danga College te ai pawhin Infrastructure nei tha a nih thu a sawi a, zirna tha din tur chuan Building tha neih kan mamawh hmasa tih sawiin, Building tha leh changkang tak tak an neihte chu hmang tangkaia, thawktute leh zirlaite pawh thahnem ngai leh tih takzeta Mamit College hmel timawitu ni zel turin a chah bawk.

He hunah hian Mamit bialtu MLA, Er. H. Lalzirliana pawhin thusawiin Mamit District chuan hmelthar a hmu chho mek tih a sawi a, Mamit District-in Science zirna an la neih ngai reng reng loh Higher Secondary School-ah hawn a ni ta chu lawmawm a tih thu sawiin, a aia sang zawk zirna hawn a nih theih nana hmalakna pawh kalpui a nih dawn thu a sawi bawk.

Govt. Mamit College hi kum 1983 ah hawn niin tunah hian zirlai 156 an awm mek a, thawktu Regular 15 leh Temporary 14 an awm mek bawk a. Inrinni-a hawn tak Library-cum-Seminar Hall hi a zau zawng 395.18 Sq.m niin cheng nuai 160 senga sak a ni a. Mi 132 len theihna tur a ni. Academic Building hawn tak hi Sq.m 482-a zau niin cheng nuai 153 senga sak a ni a, ft. 103×24-a zau niin Zirlai naupang 184 len theihna a ni a, Classroom 7 a awm bakah Faculty Room pakhat a awm bawk a ni.