Zuangleng ram-ah Tomato chin beihpui thlak dawn

Horticulture Department chuan Serchhip Zuangleng ram-ah Tomato ching turin hma an la mek a, nimin khan Zuangleng ram-a Tomato ching turte hi kokhawmin Farmers Interest Groups (FIGs) dinin hmalak dan tur hrilhfiah an ni.

Serchhip Zuangleng ram-a Tomato Cluster din tur atana Tomato ching turte hi nimin chawhma dar 11:00 khan Serchhip-a Horticulture Conference Hall-ah kohkhawm niin he hun ah hian Serchhip DHO, M. Vanlalzami chuan Zuangleng zau-a Tomato ching tura hma an lak dan tlangpui sawiin, Serchhip District chhung North Vanlaiphai, Leng leh Hualtu-ah te Green House hmanga Tomato an thar tawh dan te Chief Minister in a hriat thu leh Serchhip-ah mi tam tak ram nei lo, mi ram hawh-a nasa taka hna thawk thin ten eizawnna an neih theihna tura proposal siam tura an tih angin hmalak a nih thu a sawi a ni.

Serchhip DHO chuan helai hmun ah hian mi 40 ten FOCUS leh Horticulture Department hmalakna hnuaiah hma an lak tur thu sawiin, tunah hian heng mi 40 te hi thlanchhuah an nih tawh thu leh ti tak tak thei tur leh hlawhtling ngei tur an zawn thu a sawi a. A hma lama hma an lo lak tawh ah hian Sq.M 200-a zau chu chhungkaw pakhat in an enkawl thin thu leh tun tumah erawh chuan chhungkaw pakhat hian Sq.M 400 zel an enkawl tur thu a sawi a, Green House 160 zet a awm dawn avangin he hmalakna hi a lian dawn hle tih sawiin, tunah hian Approval hmuh ni tawhin sum sanction a nih veleh hmalak nghal a nih dawn thu leh kumthar tir ah chuan hmalak bul tan a nih an beisei thu a sawi bawk.

Nimin-a he hun hmanna ah hian heng Tomato ching turte hi FOCUS lama mithiam ten an kalphung turte hrilhfiahin chhungkaw 40 te hi Farmer Interest Group (FIG) pahnih-ah then an ni a, heng FIG-a hruaitu turte pawh hi anmahni atang hian inthlang nghalin an mawhphurhna turte hrilhfiah nghal an ni bawk a ni.