ZPM in Lalduhoma an chhuan thu an sawi

ZPM General Hqrs. chuan Serchhip bialtu MLA, Lalduhoma’n, “Kei chu ZPM thlantlin ka ni a, ka phatsan lo a lawm,” tia amah thlang tlingtute hrereng a, a phatsan lohzia huaisen taka tarlang chu chhuanawm an tih thu an sawi.

Nimin-a thuchhuah an siamah ZPM General Hqrs. chuan Serchhip Constituency atanga thlantlin MLA, Lalduhoma, MLA atanga ban anih theihna atana hektu MNF MLA te leh Lalduhoma chu Nov. 3, 2020 (Thawhlehni) khan Assembly Secretariat Conference Hall-ah Speaker, Lalrinliana Sailo hmaah an inlan tih sawiin, he hun-a “Kei chu ZPM thlantlin ka ni a, ka phatsan lo a lawm,” tia amah thlang tlingtute hre reng leh a phatsan lohzia huaisen taka tarlangtu Serchhip bialtu MLA, Lalduhoma chu ZPM Party chuan chhuanawm an ti hle tih an sawi a. “MNF MLA te thusawi zawng zawng khan min thlangtu ZPM laka ka rinawmzia a rawn nemnghet a, kan tang tlâng a ni ta ber a, MNF MLA te hnenah hian lawmthu ka hrilh let duh hial zawk a ni,” ti-a Dan hnuaia a dikzia leh amah thlangtu ZPM a phatsan lohzia huaisen taka a sawi chu chhuanawm an tiin an chhuang takzet tih an sawi a ni.