Mizoram-ah hri kai 101 hmuhchhuah thar an ni

Niminpiah-a Mizoram-a Sample enfiah atangin COVID-19 hri kai mi 101 zet hmuhchhuah leh an ni a, an zinga mi 60 te chu State pawn atanga rawn lut, Company hnuaia hna thawk tur an ni thung.

Niminpiah khan ZMC Laboratory-ah Sample 686 enfiah leh niin heng atang hian COVID-19 hri kai mi 59 hmuhchhuah an ni a, an zinga mi 30 te chu Shivalaya Construction Company hnuaia hnathawk tura Jharkhand atanga rawn kal, Inkhuanghranna hmuna awmlai an ni. Hetihlai hian hri kai hmuhchhuah zinga mi 8 te chu Aizawl Salem Veng ami an ni thung a, Chhinga Veng atangin hri kai 4 hmuh niin Ramthar Veng, Bethlehem Vengthlang, Khatla, Seling leh Lunglei atangin hri kai 2 ve ve hmuh an ni bawk a, Ramthar North, Republic Veng, Republic Vengthlang, Zemabawk Kawn Veng, Zemabawk Vengthar, Siaha leh Chanmari West atangin hri kai pakhat theuh hmuh a ni bawk. Heng hri kai hmuhchhuah zinga mi 24 te hi hri kai tawh te nen inkawmhnaih atanga hri kai te an ni.

Niminpiah vek khan Mizoram-a TrueNat Laboratory-ah Sample 128 enfiah niin hri kai mi 30 hmuh an ni a, an vai hian Champhai District-a hri kai hmuhchhuah vek niin Jharkhand atanga rawn kal, Tarmat company hnuaia hnathawk niin anmahni hmun, Melbuk-a inkhunghrang lai an ni. Rapid Antigen Test hmanga Sample 244 enfiah ah hri kai 12 hmuhchhuah an ni bawk a, Aizawl Dinthar Veng-ah hri kai 8 hmuh niin Thingsulthliah-ah JNV CCC-a Duty mi 2 te chuan hri an kai tih hmuh-chhuah a ni a, Seling-ah mi pakhat leh Ramhlun Sports Complex-ah mi pakhat te chuan hri an kai tih hmuhchhuah a ni bawk.

Nimin khan Mizoram-ah mi 59 te chu enkawl dam ni ve lehin Mizoram-a hri kai hmuhchhuah 2893 atangin 2435 te chu enkawl dam an ni ta a, hri kai enkawllai 457 la awmin 84.17% an dam tawh a ni.

India-ah hri kai 92.09% enkawl dam an ni tawh :

India rama COVID-19 hri kai hmuhchhuah atanga zaa 92.09 te chu enkawl dam an ni ta. Ministry of Health & Family Welfare chhin-chhiahna atanga a lan danin darkar 24 kalta chhung khan India ramah COVID-19 hri kai mi 53,357 te chu enkawl dam leh niin heti hian tun thlengin hri kai enkawl dam chu 76,56,478 an tling ta a, hei hi hri kai hmuhchhuah zawng zawng atanga chhutin zaa 92.09 an ni.

Darkar 24 kalta chhung khan India ramah Sample 12,09,609 enfiah leh niin hri kai hmuhchhuah thar 46,253 an awm leh a, India rama Sample enfiah zawng zawng 11,29,98,959 atangin hri kai hmuhchhuah chu 83,13,876 an tling ta a ni. India ramah hri kai enkawllai 5,33,787 an la awm mek a, hei hi hri kai hmuhchhuah atanga chhutin zaa 6.42 a ni a, hri kai zingah nunna chan 1,23,611 an awm tawh bawk a ni.