MNF Party in MZU leh College chungah lawmthu sawi

MNF Party chuan Mizo zirlaite hmakhaw ngaia University leh College ten kumin a Seat an tihpun theih avangin University lama thuneihtu leh College Principal-te chungah lawmthu an sawi.

Nimin-a thuchhuah an siamah MNF Party chuan COVID-19 avangin Mizoram pawn atangin Mizo zirlai tam tak chu an zirlai zir zawm thei lovin an lo haw ruih ruih a. Hetih mek lai hian Mizoram chhung atangin Graduate thar thahnem tak an awm mek reng bawk tih tarlangin, hetianga harsatna kan tawh mek lai hian Higher & Technical Education Minister, Dr. R. Lalthangliana chuan Mizoram University-a Vice Chancellor, Prof. K.R.S. Sambasiva Rao chu lehkha a thawn bakah Vice Chancellor, Registrar, Controller leh thuneitu hrang hrangte chu Telephone hmanga sawipui bawkin, Minister ngenna chu ngai pawimawhin University-a thuneitu hrang hrangte chu Nov. 2 khan thukhawmin zaa 10 atanga 30 (10% to 30%)-a seat an tihpun thu leh, hei hian zirlai zawng zawng chu phuhruk thei dawn lo mahse, zirlai tam tak harsatna chu a phuhruk thei dawn tih an sawi.

Hei bakah hian Dr. R. Lalthangliana hian kumin kum laihawl vel khan Mizoram-a Govt. College Principal leh Private College Principal-te chu lo kokhawm tawhin a tam thei ang ber seat lo tipunga tan la turin a lo hrilh tawh bawk tih sawiin, Minister ngenna hi ngaih pawimawh a lo ni tawh tih an sawi a. Hetianga Mizo zirlaite hmakhaw ngaia Minister thu thlen an ngaih pawimawh leh tihhlawhtlinsak avang hian University lama thuneihtu leh College Principal-te chungah lawmthu an sawi a ni.