Zaithiam lar Zira Hnamte boralin vuiliam nghal a ni

Mizoram-a Zaithiam lar zing ami, Zira Hnamte tia hriat, Zirkunga Hnamte chu zing khan lungphuchawl in a boral a, vuiliam nghal a ni.

Zira Hnamte hi nimin zing dar 4:40 vel-a a tho chu a thawk a buai thut avangin theih ang anga bawih sawmin Civil Hospital, Aizawl panpui a ni a. Doctor te leh Nurse ten theih tawp-a an buaipui chungin zing dar 5:40 khan a boral zui a, a ruang hi nimin chhun dar 12:00 khan BCM City Church Kohhran Hall-I ah vuiliam a ni.

Zira Hnamte hi April 23, 1951 khan Darzo khua ah a piang a, unau 7 niin sawrkar hna hrang hrang a thawh hnuah kum 2018 khan a pension a. Kum 1974 chho atangin zai leh hlaphuah lamah inhmangin AIR Shillong leh Aizawl-ah hla 160 lai a khung a, lengzem, lenglawng leh Pathian hla hi 71 vel a phuah ve bawk a, chawimawina chi hrang hrang pawh dawngin Audio Album pawh 8 lai a siam a, a hla sak zinga Zoram dengchhuak engemaw zat a awm bawk. Zira Hnamte hian kum 1977 khan K. Rothangpuii chu nupui-ah neiin fapa pathum leh fanu pakhat a nei a ni.