Latest News

Lunglei-ah Insurance lem hmuhchhuah a ni

Tunhnaiah Lunglei-a insurance lem engemaw zat hmuhchhuah niin Lunglei District chhunga The New India Insurance Company Ltd. hnuaia Insurance ti zawng zawngte chu in report tura tih an ni.

Lunglei District SP in thuchhuah siama a tarlan danin tunhnai-a Lunglei Traffic Police ten lirthei document endikna an neih atangin Lunglei-a lirthei neitu thenkhat ten insurance lem ni-a rinhlelh an hmang thin tih hriatchhuah a ni a. Insurance lem ni-a rinhlelh hmuhchhuah chungchangah insurance company lama thuneitute zawhfiah nghal an ni a, Insurance hotuten a lem a ni ngei tih finfiah in, hemi bawhzui hian Branch Manager, The New India Insurance Company Ltd., Aizawl Branch chuan Lunglei Police Station-ah FIR thehlutin, an Company hminga insurance lem lo pechhuak thin chu zawng chhuak tur leh an chunga hma la turin a ngen a ni.

Hemi chungchang Lunglei Police ten an chhui zuina ah Insurance lem engemaw zat hmuhchhuah a ni tawh a, hemi chhuina kal zelah hian Lunglei District chhunga The New India Insurance Company Ltd. hnuaia Insurance nei zawng zawng te chu Lunglei Police OC hnenah in hriattir tur leh an Insurance Certificate leh lehkha pawimawh dan te enfiah tura keng turin an ti bawk.

Lunglei SP thuchhuah chuan Insurance lem siamchhuah leh hman chu dan-in a khap tlat a nih thu leh, mipui vantlang himna atana thil pawi thlen thei a nih bakah sawrkar phalloh thil a ni tih a tarlang a. Hei vang hian mipuite chu fimkhur tur leh insurance lem leh diklo laka fihlim turin a ngen bawk a ni.

Comments

Popular News (Last 30 Days)