Mizoram-ah COVID-19 hri kai 60 hmuh leh an ni

Niminpiah-a Mizoram-a Sample enfiah atangin COVID-19 hri kai mi 60 zet hmuhchhuah leh an ni a, Aizawl District pawn lama hri kai hmuhchhuah chu mi 5 chiah an ni.

Niminpiah khan ZMC Laboratory-ah Sample 699 enfiah niin heng atang hian hri kai mi 51 hmuh an ni a, an vai hian Aizawl District-a hri kai hmuhchhuah niin an zinga mi 14 te hi State pawn atanga rawn haw leh a dang te hi tualchhunga hri inkaichhawng leh hri kaina mumal tak la hriat loh te an ni thung a, a tam zawk te erawh tualchhung a hri inkaichhawng an ni thung.

Niminpiah vek khan Rapid Antigen Test hmangin Sample 778 enfiah niin hri kai 8 hmuh an ni a, Aizawl District-ah mi 5 leh Lawngtlai District-ah mi pahnih an ni. District hrang hranga TrueNat Laboratory-ah Sample 68 enfiah niin hri kai mi pakhat hmuhchhuah a ni a, Champhai-ah State pawn atanga rawn haw a ni thung.

Nimin khan Mizoram hmun hrang hrang atangin hri kai mi 28 te chu enkawl dam an ni ve leh thung a, heti hian nimin tlai thleng khan Mizoram-a COVID-19 hri kai hmuhchhuah chu mi 3156 niin mi 2684 te chu enkawl dam an ni tawh a, tunah hian hri kai enkawllai mi 470 awmin hri kai zingah nunna chan mi pahnih an awm tawh bawk a ni.

India-ah hri kai hmuhchhuah nuai 85 an tling tawh :

India rama COVID-19 hri kai hmuhchhuah chu mi 85,91,730 an tling ta a, heng zinga mi 79,63,457 te chu enkawl dam niin hri kai hmuhchhuah atanga zaa 92.29 te chu enkawl dam an ni tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 10,43,665 enfiah leh niin heng atang hian hri kai 38,073 hmuh leh an ni a, heti hian India rama Sample enfiah zawng zawng chu 11,96,15,857 niin hri kai hmuh tawh hi 85,91,730 an ni a, Sample enfiah atanga za zela 7.18 te chuan hri hi an kai a ni.

Darkar 24 kalta chhung khan India ramah hri kai 46,084 enkawl dam leh niin tun thlenga hri kai enkawl dam chu 79,63,457 an ni a, hei hi hri kai hmuhchhuah atangin zaa 92.29 an ni a. Hemi hun chhung hian India ramah hri kai nunna chan 448 awm lehin tun thlengin hri kai zingah nunna chan 1,27,05 an awm tawh a, tunah hian hri kai enkawllai 5,01,214 awmin hei hi hri kai hmuhchhuah atangin zaa 5.83 a ni bawk.