Tlawva Small Hydel Project atangin kawlphetha siamchhuaka semchhuah a ni

Khuangthing leh Thekpui inkar Tlawva lui atanga kawlphetha siamna tur, Tlawva Small Hydel Project (SHP) chu peihfel a nih hnuah helai hmun atanga kawlphetha siamchhuah chu phai atanga lakluh kawlphetha dang nen hlawhtling taka chhunfinin Khawbung Electric Sub-Station atanga semchhuah a ni.

Tlawva Small Hydel Project hi tunkar khan a siam hna thawktu, Nortech Power Project Private Ltd, Kolkatta atanga mithiam lo kalte'n an enfel hnuah kawlphetha an siamchhuah chu Phai atanga kawlphetha lo kal nen hlawhtling taka chhunfin a ni a, tunlai hian tui a tlem tawh avangin kawlphetha siamchhuah theih zat chu Kilowatt (KW) 600 a ni a. Hei hi Khawbung Sub-Station atanga eng pekchhuah Zaa 80 vel a ni a, tui tam lai chuan  KW 5000 a siamchhuak thei dawn a, Champhai District tan chhenfakawm tak a ni dawn niin thawktute chuan an sawi.

Tlawva SHP atana Original Estimate hi cheng nuai 5,749.08 niin Contractor, Nortech Power Project hnenah 'Turn-Key Contract' (contractor hnenah sum pek tawp-a Contractor-in a thawh zawhah sawrkar hnena a hlan tur angin cheng nuai 5,670 hmanga siam turin pek a ni a; a tìra ruahmanna tihdanglam a ngaih vang te, tuikawng siam turah leimin nasa tak a awm avang leh hmundanga sawn a ngaih avangin Revised Estimate chu cheng nuai 7,340-ah siam a ni a. He Project atan hian March 2012-ah contractor-te nen agreement ziah niin, thuthlung ziah atanga thla 36 (kum 3) chhunga zawh tur a nih laiin, March 2015 thlengin 20% pawh an thawk hman lova. Zawh hun hi tum ruk dang - December 2016, December 2018, June 2019, September 2019, June 2020, July 2020 thlengte pawhsei leh niin tunah chuan an zo dawn hnai ta niin a lang.

Tlawva SHP-ah hian kawlphetha kilowatt 2,500 (megawatt 2.50) pechhuak thei kháwl pahnih bun a ni a, ruahtui tlâk tam lai, May-October inkarah chuan MW 5 (kilowatt 5,000) pechhuak theia ngaih niin, November-February chhung erawh chuan MW1 siam chhuak thei tura ngaih a ni. Kum khatah kawlphetha Million Unit 13.47 pechhuak thei tura ngaih a ni a, chuta tang chuan kumtin cheng nuai 491.66 hmuh lêt beiseiin, kum 15 hnuah a siamna man hmuh lêt beisei a ni.

Tlawva SHP hi mumal taka a thawh theih hunah Mizoram sawrkarah an hlan chauh dawn niin Mizoram sawrkar atanga Project hnathawh viltu Sr. EE, R. Lalrinkima chuan a sawi a. Tui a tlem tawh avang leh Company hnathawkte Puja hmanga an haw dawn avangin kawlphetha pek chhuah hi chawlhsan rih a ni dawn bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn