Chganchin thar thenkhat :

YMA in Tripura kawng siam hnatlang an nei leh

Zampuimanga Group YMA Committee in an lo rel tawh bawhzuiin nimin khan Tripura atanga Mizoram ei leh bar lakluhna tur Bairabi-Zamuang-Tripura kawng thawmthat hnatlang neih leh niin he hnatlang-ah hian mi 150 vel zet an thawkchhuak leh a. Bairabi atanga Tripura panna Medili Lei hi KM58 niin tunah hian Mizoram PWD ten siam hna an thawk mek a, kawng siam nan hian a tirah sawrkar in cheng nuai 35 ruahman in a tlachawp in mamawhdan a zir a hman zel anih thu PWD hotu te chuan an sawi a. Lei pahnih- Teirei leh Langkaih lei pawh chei that mek a nih thu PWD hotute chuan an sawi bawk.


Mizoram-ah lirthei rawn lut

Ramri-a buaina thleng avanga Mizoram a lirthei lut tur Assam lama hun engemaw chen dan chu nizan hmasa khan tihtawp a ni a. Mizoram a lirthei lut tur dan chungchangah hian niminpiah khan Kolasib DC, Dr. H. Lalthlangliana chuan Vairengte dai a tlawh a, Cachar DC nen an in-biak hnuah Kolasib DC chuan State pahnih Chief Secretary ten Union Home Secretary hova an inbiakna ang thlapa kal an nih thu sawiin, Vai-rengte dai-a Mizo IR Duty dah chu Meeting thu-chhuak ang thlap a nih thu a sawi a. Lailapur-a pawl pakhat hruaitute chuan IR Duty te hi hnuk-kir turin phut mah se Kolasib DC hian thil theih a nih loh thu a sawi a. Hemi hnu nizan hmasa dar 6:00 vel khan Lailapur lama lirthei tangkhang hi an rawn chhuah a, nimin tlai dar 4:00 thleng khan lirthei 961 a rawn lut tawh a ni.


Check Gate thar hawng

Myanmar atanga dan phalloh bungrua chi hrang hrang lakluh doletna tura Khawzawl Tui-senphai bula Temporary Check Gate siam thar chu niminpiah tlai khan Khawzawl District Bawrh-sap, Zothanmawia chuan a hawng a, Khawzawl DC chuan helai hmun chauha Check Gate siam chu a tawk lo tih sawiin, Rabung-ah pawh Check Gate siam a lo ni tawh a, Rabung Check Gate siam tura ruahmanna an siam atanga ni hnih thum hnu leka Duty tur Khawzawl DFO (Wildlife) in a lo ruahman fel chu lawmawm a tih thu a sawi bawk. He huna tarlan a nih danin kumin January atanga October thla thleng khan Khawzawl Police te chuan Dan kalh a bungraw phur Motor 71 bakah Kuhva Bag 1272, Foreign Cigarettes Case 30 leh Poppy Seeds Bag 38 an man a, Dan phal loh thil an man hlut zawng hi Rs.95,38,204/- a tling tawh a ni.


VC bye-election nei zo

Mara Autonomous District Council hnuaia VC 8-ah tun thla ni 10 khan bye-election neih niin Seat 38 awmah MNF in seat 23 lain BJP in seat 14 an la a, Congress in seat khat an la bawk.


Mizoram sawrkar an phut

Ministry of Home Affairs-in COVID-19 avanga Lockdown Guidelines leh instruction a siam bawhchhiaa Assam miten rei ei leh bar (essential commodities) min hrek nana rei tak chhung National Highway-306 an dan chah avanga Mizo-ram-in harsatna kan tawh phah chu PC Party chuan pawmzam mai mai chi-ah an ngailo tih thuchhuah siama tarlangin, Dan lova Assam mite chetna ah hian Centre-in action a lak ngeina tura hma la turin Mizoram sawrkar an phut thu an sawi a. Hetianga ei leh bar-a min hrekna tura an hmalakna hrang hrangte hi sawrkar laipui-a thlen turin Mizoram sawrkar an phut thu an sawi bawk.


Bank hmalakna thlirlet

Khawzawl District-a Bank hrang hrangte hmalak dan thlirletna hun, Khawzawl District Consultative Committee/District Level Review Committee thutkhawm chu niminpiah khan DC Conference Hall-ah neih a ni a, he huna tarlan a nih danin Khawzawl District-ah hian June thla tawp thleng khan Bank Branch 7 awmin  Indian Post Payment Bank awmna khua 18 a awm bawk a. Kumin June ni 30 thleng khan Khawzawl District chhung Bank hrang hrang ah pawisa dahluh cheng nuai 12070.70 awmin Loan pek chhuah cheng nuai 6158.15 a awm bawk a, CD Ratio chu 51.02% a ni.


Hnahthial-ah DCSO dah duh

Nimin khan Hnahthial-a District Civil Supplies Officer (DCSO) Office a awm theih dan ngaihtuahin Hnahthial District Bawrhsap, Van-lalmawia hovin  Lunglei DCSO, Carolyn LB. Khiangte leh mi pawimawh dang te an thukhawm. He thutkhawm ah hian Hnahthial District chhunga awm si, DCSO Serchhip in a huam Thingsai, Cherhlun leh South Chawngtui VCP te chuan DCSO thuthmun Hnahthial-a a awm chuan Hnaththial lama beh an duh tih an sawi a. Tuna Supply Godown an neih mek chu a tet deuh avang leh a awmna chu khawchhung a nih avangin DCSO Office Complex-a hmana, Godown tur hi la ngaihtuah leh nise an ti bawk a ni.


Central YMA in lawmthu sawi

Mizoram leh Assam ramri buaina avanga Lailapur-a kawng dan pin a nih chhunga Mizo mipui dawhtheihna leh insumtheihna ah Central YMA chuan lawmthu an sawi tih nimin khan thuchhuah siamin an tarlang a, kawng dan tihtawp a nih theih nana thawktute chungah lawmthu an sawi bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn