Chief Secretary hovin Mizoram-ah Steering Committee on COVID-19 Vaccine thutkhawm neih a ni

Nimin khan Chief Secretary, Lalnunmawia Chuaungo hovin State Steering Committee on COVID-19 Vaccination thutkhawm chu Aizawl-a Chief Secretary’s Conference Hall-ah neih a ni.

He thutkhawm kaihruaitu Chief Secretary chuan Covid Vaccine lam hawi thutkhawm neih theih a ni chu lawmawm a tih thu leh a hma lama thutkhawm neih theih a ni chu a lawmawm zual a tih a sawi a, State dang zawng aia hma la tha nih tum turin Health Department leh member kalkhawmte a chah a ni.

Health & Family Welfare Secretary, H. Lalengmawia pawhin a hma lama hmalakna awm chu lawmawm a tih thu he hunah hian sawiin, khawvel ram hrang hrang ten vaccine siam chhuah lamah enchhinna an neih mêk thu leh kum 2021 chawhma lamah chuan India ram pawhin vaccine kan neih ve tawh a beisei awm thu a sawi bawk.

National Expert Group on Vaccine Administration for Covid-19 (NEGVAC) in State Steering Commitee on COVID-19 Vaccination te chu COVID-19 Vaccine Introduction atan hma la tur leh State chhunga hmalakna te vil zui turin a ruat a. A khat tawka Meeting nei tura beisei niin State Task Force Committee din a, chumi hnuaiah District tinah DC Chairman-na hnuaia District Task Force Committee on COVID-19 Vaccination din leh tur a ni ang.

NEGVAC-in a ruahman danah chuan a tahtawlin Health Institution hnuaia thawktu, Private leh Govt. Database-a khawn khawm mêk a. MoH&FW chuan COVID Vaccine pek hmasak tur ruahmanna hi a la siam chho zel dâwn a ni. Mizoram sawrkar hnuaia Department hrang hrangte he Committee-ah hian telin, Department zawng zawngte tanrualna a pawimawh thu Chairman chuan a sawi lang bawk.

Hetianga ruahmanna a kal mek lai hian Sawrkar Laipui chuan Vaccine Company leh a siamchhuaktu ram leh Brand hming hman tur hi ala puang lo a. COVID-19 vaccine a awm huna lo dah thatna tur hmun (Cold Chain Point) leh a semchhuah dan (logistic and transportation) te uluk leh ngun thluk taka sawihona neih a ni a. Hrivenna lam (Immunisation) kaihhnawih hrang hrang te leh harsatna awm mekte bakah hmalak chhoh zel dan turte kimchang taka sawiho a ni bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn