Serchhip-ah ODF Plus zirhona neih niin Thingtlang-a Ek In thawmthatna tur vailiam a ni

PHE Serchhip WATSAN Division leh Swachh Bharat Mission (Gramin) Serchhip District hmalakna in nimin khan Serchhip-ah ODF Plus Awareness Campaign neiin Retrofitting of Toilet Flag Off Programme hman a ni a, he hun hi SBM (G) Mission Director, C. Chawnghnuna chuan a rawn hmanpui a ni.

Swachh Bharat Mission (Gramin) hmalakna hnuaia Serchhip District chhung thingtlang khua a chhungkaw thlan bik 30 te tana an Ek In thawmthatna tur bungrua pekchhuah tur vailiamna hun, Retrofitting of Toilet Flag Off Programme hi nimin chawhma dar 11:00 khan Serchhip PHE Complex-ah hman niin heng bungrua te hi Er. C. Chawnghnuna, Mission Director, SBM (G) Mizoram chuan a vailiam a, heng bungrua an vailiam tak te hi Comode, Pipe leh Ek In sakna atana hmanraw pawimawh dangte niin Serchhip District chhung khaw hrang hranga pekchhuah a ni.

Hemi hnu hian PHE Serchhip WATSAN Division Office-ah ODF Plus Awareness Campaign neih zui a ni a, he hunah hian Er. C. Chawnghnuna, Mission Director, SBM (G) Mizoram chuan Swachh Bharat Mission hnuaia an hmalakna te chu a theuneu lo hle tih sawiin, hei hi District hrang hrang ten sawrkar laipui atanga lawmman an lak thin ah a lan thu a sawi a, Mizoram chu kawtthler-a inthiar awmlohna hmun, Open Defecation Free-ah puang tura hma an lak nasat thu leh Oct. 2, 2019-ah puan a nih thu sawiin, mimal leh Vantlang ten Ek In te pawh sak a nih thu a sawi bawk.

SBM (G) Mission Director chuan tunah hian ODF atangin ODF Plus ni tura hmalakna kalpui leh mek a nih thu sawiin, kum 2024 thleng awh tur he hmalakna ah hian ODF kan nih tawhna vawngnung chungin mikhual te tan pawha hman theih tur Vantlang inthiarna pakhat tal sak a nih dawn thu te, khawchhung a fai em em tur a nih thu te, khawchhunga mihring chenna atangin Bual In leh Choka-a chhuak tui tling a awm tur a nih loh thu te, Bawlhhlawh tawih thei paihna hmun khaw tinah a awm tur a nih thu leh Plastic hnawmhnawk khawchhung ah hmuh tur awm lovin a dahkhawmna hmun bikah dahin a sawngbawlna hmun siam ah lakkhawm tur a nih thu te a sawi a, heng hmalakna te hi khaw tinah kalpui a nih dawn thu leh he huna tel, WATSAN Committee hruaitute chu anmahni khua theuh ah theihtawp chhuah turin a chah bawk a ni.

ODF Plus Awareness Campaign hi PHE Serchhip WATSAN Division-a Sr. EE, Er. F. Lalsanglura chuan kaihruaiin ODF atana hma an lo lak tawh dan te a tarlang a, Serchhip District chu Mizoram-a ODF District 4-na niin District titha pathum-ah kan lan phak thu a sawi a, India rampum intihsiakna ah State te leh UT zingah pahnihna kan nih thu sawiin, tunah hian World Toilet Day Award dawng tura thlan niin Vawiin-ah Serchhip leh Kolasib ten he Award hi an dawn tur thu a sawi a, hei bakah hian an Department hmalakna kaihhnawih ah bawk Serchhip District chhunga Leng khua chuan India hmarchhak-ah VC tha lawmman pakhatna an lak thu a sawi bawk.

Nimin-a ODF Awareness Campaign-ah hian PHE Serchhip leh Tlungvel Sub-Division hnuaia WATSAN Committee hruaitu pakhat theuh telin Samuel Lallawmzuala, District Coordinator, SBM (G) Serchhip District chuan kalkhawmte hi ODF Plus nihphung leh hmalakna turte a zirtir a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn