Hri kai 7 hmuh belh an ni

Niminpiah-a Serchhip District-a Sample enfiah atangin COVID-19 hri kai mi 7 zet hmuh-chhuah leh niin Serchhip District-a hri kai hmuhchhuah chu za aiin an tam ta.

Niminpiah khan Serchhip District-a TrueNat Laboratory-ah Sample 41 enfiah niin heng atang hian COVID-19 hri kai mi 5 hmuhchhuah an ni a, heng mite hi mipa vek niin Mizoram Police mi leh sa, tunhnaia Bihar inthlanpui-a Duty-a kal te leh tun thla ni 4-a Serchhip-a rawn thleng niin Thenzawl-a PTS-a inkhunghrang lai an ni a, taksa-a natna hri kai lanchhuahna neilo an ni.

Niminpiah vek khan Serchhip District-ah Rapid Antigen Test hmangin Sample 90 enfiah a ni a, heng atang hian COVID-19 hri kai mi pahnih hmuhchhuah ni bawkin heng mite hi niminpiah-a State pawn atanga rawn lut an ni a, mipa ve ve niin Bhavya Construction Pvt. Ltd. hnuaia thawk tur, Company hmun-a inkhung-hrang lai an ni a, anni pawh hi taksa ah natna hri kai lanchhuahna neilo an ni bawk.

Heti hian nimin thleng khan Serchhip District-ah COVID-19 hri kai hmuhchhuah chu mi 102 an tling ta a, an zinga mi 87 te chu enkawl dam ni tawhin tunah hian hri kai enkawllai 15 an la awm mek a ni. Tun dinhmunah hri leng avangin Serchhip District-ah mahni In lama in-khunghrang 20 leh sawrkar hmunhmaa inkhung-hrang 263 an la awm mek a ni.