North Vanlaiphai VC inthlanna a Vote tla te chhiar that niin chhiar zawh theih ala ni lo thung

Kumin August 27-a Village Council inthlanpui neih zawh taka Serchhip District atanga lungawilohna thlen awmchhun, North Vanlaiphai Village Council inthlanna-a Vote tla te chu nimin khan chhiar that niin nizan dar 10:00 thleng khan chhiar zawh ala ni lo.

Kumin August 27-a Vilage Council inthlanpui neih ah khan Serchhip District chhung, North Vanlaiphai Village Council-a inthlanna neih ah thil fello tam tak a awm nia hriain he inthlanna a ZPM Candidate 4, Independent Candidate leh INC Candidate pakhat bakah ZPM Agent 3, Independent Agent pahnih leh INC Agent pakhat, an vaiin mi 15 te chuan State Election Commission-ah he inthlanna a Vote tla te hi chhiar tha leh turin ngenna an thehlut a. He an lehkha thehluh ah hian thil fello nia an hriat langsar 5 tarlangin, RO in Candidate/Counting Agent te Vote chhiar en a phalloh thu te, Inthlan a zawh hnuin Bawm Seal a nih loh thu leh Seal tura Candidate emaw, Agent emaw tumah hrilh an nih loh thu te, Bawm hawn dawnah Candidate/Agent rawn an nih loh thu te, Service Vote leh Postal Vote a awm ngei nia an hriat thu leh hei hi RO in Candidate/Agent te hnenah engmah a puan loh thu leh Vote thlakna ah Kutzungpui-a nem Official ten an phal laiin Vote chhiarna ah hian Vote thi ah an puang leh si nia sawiin, hei vang hian Vote thi pawh 1158 lai awmin, hei hi Candidate/Agent te an rawn loh thu te an sawi a ni.

Hemi chungchang ngaihtuah tur hian Mizoram sawrkar in Serchhip District tana Election Tribunal a din chuan lungawilohna thlentute leh he inthlan buaipuitute hi nimin chawhma dar 10:30 khan Serchhip DC’s Conference Hall-ah kokhawmin he hun hi Election Tribunal Chairman, CC. Lalchuangkima chuan a kaihruai a, Election Tribunal-a Secretary, Vanlalrova leh Member, Malsawmtluanga te pawh telin chawhma lamah heng lungawilohna te hi sawihoin zawhna awm te chhan a ni a, hemi hnu hian lungawilohna thlentu ten an phut angin Election Tribunal-a Official te hian he inthlanna a Vote tla te hi an chhiar nawn leh a ni.

He inthlanna a Ballot Paper nung te hi nizan dar 7:30 vel khan chhiar zawh niin amaherawh chu Vote nunglo nia hriat te Ballot Paper nia sawi chu hmuh tel a ni lo thung a, heng Ballot Paper te hi Strong Room-ah zawn niin nizan dar 10:00 thleng khan hmuh kim ala nih loh avangin Candidate te Vote hmuh dan hi hriat theih ala ni lo a, hei vang hian eng tianga kalpui zel tur nge pawh hriat theih ala ni rihlo a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn