Chanchin thar thenkhat :

MP in Model Village tur tlawh

Mizoram Lok Sabha MP, C. Lalrosanga chuan Model Village atana thlan Damparengpui khua chu nimin khan a tlawh a, khawtlang hruai-tute nen BNRGSK Hall-ah inkawmna an nei a ni. He inkhawmna ah hian Lok Sabha MP chuan Model Village atana Damparengpui an thlan takah chuan, khaw dangte tana kawng hrang hranga entawn tlak ni turin hmasawnna hrang hrang leh nunphungah theih tawp mite enkawn tlak ni tura tan la turin a ngen a, Model Village atan hian a hranpa in Scheme a awmlo nain CSS hmangin a theih ang chin chinah nasa taka hma lak tum a nih thu a sawi bawk a. Model Village atan hian Bialtu MLA leh sawrkar department hrang hrangte nen tangkawpin hma lak tur a nih thu a sawi bakah ramri dep anih avangin BRO ten kawngpui an enkawl mek chu chak zawka thawh a nih theih nan Union Defence hnenah a ngaih pawimawh thu ziakin a thlen thu a sawi bawk.

CMRF atangin sum ruahman

Tunhnaia COVID-19 hri kai hmuhchhuah tamna leh hri leng avanga Containment Zone-a puan, Aizawl Dinthar Veng huamchhunga chhung-kaw khawsak harsa mi 675 ten inkharkhipna avanga harsatna an tawh engemawchen phuhruk sak nan Rs. 1000/- theuha an dawn turin nimin khan Chief Minister's Relief Fund for COVID-19 atanga Rs. 6,75,000/- ruahman a ni. Aizawl Dinthar Veng-ah hian nimin tlai thleng khan hri kai 87 hmuhchhuah ni tawhin mi 38 te chu enkawl dam an ni tawh a, hri kai enkawllai 48 awmin nunna chan pakhat a awm tawh a, Oct. 21, 2020 atang khan hri kai hmuh an ni tawh a ni.

SEC-ah complain thehlut

Assembly Speaker, Lalrinliana Sailo chuan LADC huamchhunga khaw hrang hrang tlawhin nimin khan Lawngtlai-ah Public Leaders te a kawm bawk a, hei hi thla thar-a inthlanna neih turah Election Model Code of Conduct Rules bawhchhiatna ni ngeia hriain MPCC Vigilance Department chuan SEC-ah complain an thehlut.

Medical Mask hlan

Kiwanis International, Taiwan te chuan nimin khan Chief Minister, Zoramthanga hnenah leh Health Minister, Dr. R. Lalthangliana hnenah a tul apianga hman tura Medical Mask 10,000 ve ve an hlan a, Health Minister chuan COVID-19 dona atana mi inpe leh mi inphalte hnenah lawmthu a sawi a ni.

MZP nen inkawmna an nei

Nimin chawhnu khan Kanhmun BRC Hall ah MZP General Hqrs. hruaitute leh Thangram Indigenous People's Movement hruaitute chuan inkawmna an nei a, he hunah hian Thangram khaw huamchhunga Zohnahthlak cheng mek hnam peng hrang hrang- Chorei, Hrangkhawl, Molsom, Ranglong leh Sakachep aiawhte telin TIPM hotute chuan heng Zohnahthlak hrang hrangte hi singkhat aia tam an awm thu leh Assam sawrkarin a ram chhunga chhal siin, Zohnahthlak te chu nasa taka ensan thin an nih thu te an sawi bawk.

Mipui bumna pholang ah ngai

ZPM Thalaite chuan Nov. 16, 2020-a Finance Commissioner-in kan State sum harsat thu huai taka a sawi chhuak chu lawmawm an tih thu thuchhuah siamin an tarlang a, “Kan tlin chuan SEDP-ah vbc. 1000 aia tam kan dah nghal ang,” titu ten vbc. 750 chauh an dah atang khân sum lama MNF sawrkâr pachhiat zia leh a enkawl kawnga an khawr zia te, SEDP chu inbumna mai anih zia te a pholang chiang hle nia tarlangin, “An bum mipuite erawh kan khawngaih hle a ni,” an ti bawk.