National Education Day hmang

Govt. Serchhip College chuan nimin khan an College-ah ‘National Education Day’ an hmang a, thupui thlanbik hmanga Essay inziahsiakna neiin lawmman sem nghal a ni.

Govt. Serchhip College in ‘National Education Day’ puala hun an hman hi NSS Programme Officer, C. Lalram-liana chuan kaihruaiin National Education Day hi India ramin zalenna a hmuh hnua Education Minister hmasa ber, Maulana Abul Kalam Azad hriatreng nan a pian champha, November 11-ah hman thin a nih thu a sawi.

He hun hmanpuitu Govt. Serchhip College Principal, PC. Lalremsiama chuan zirna pawimawh zia sawiin, College zirlaite chu taima tak leh thiam tak tak turin a fuih a, mi thenkhat in BA mai mai leh BA fang awm anga an sawi chu thudik lo a ni tih sawiin, “BA in pass tawh chuan BA Degree in ni tawh a, chuvangin kan Degree neih mil-a thiamna nei turin lehkha i zir ang u,” tiin zirlai kalkhawm te chu a fuih a ni.

He hunah hian Resource Person atan K. Lalrinchhana, Asst. Professor chu hman niin New Education Policy (NEP) chungchang zirho a ni a, NEP 2020 hnuaia School Structure tih danglam a nih dan te, he Policy-ah hian mahni pianpui tawng ngeia pawl hniamlam (Elementary Stage) a zirna kalpui tur a nih thu te a tarlang a. Higher Education kalphung tih danglam a nih dan te pawh sawiin, NEP 2020 hi hman anih hunah chuan College zirlaite chuan a kar laklawhah pawh zirna an chawlhsan thei anga, kum thum an zir zawh hmaa an chawlhsan anih pawhin Diploma emaw, Certificate pek an nih tho tur thu a sawi a. An duh hunah an thlen chin atangin College zirna an chhunzawm leh theih dawn thu a sawi bawk.

Chawhnu lamah zirlaite tan ‘Importance of Education’ tih thupui hmangin Essay inziahsiakna neih a ni a, Lalchhuanawmi Sailo, V Sem B.Sc chu pakhatna niin Daina Lalengzami, V Sem BA chu pahnihna a nih bakah Lalhlupuii, I Sem BCA chu pathumna a ni bawk.