Serchhip District-a Model Village atana thlan khua-a hmalak dan tur sawihona neih a ni

Nimin khan Serchhip District Level Committee on Sansaad Adharsh Gram Yojana (SAGY) chu an Chairman Serchhip District Bawrhsap, Kumar Abhishek hova thukhawmin Serchhip District chhunga MP Model Village leh MLA Model Village-a hmalak dan tur an thlirho.

He thutkhawm Serchhip DC Meeting Hall-a neih ah hian District Bawrhsap, Kumar Abhishek chuan tun dinhmunah MP Model Village Khumtung bakah Tuikum bial-a MLA Model Village Khawbel leh Serchhip bial-ah Model Village Neihloh te bakah Aizawl North-II Model Village Hmawngkawn te chu Serchhip District chhunga Model Village atana thlan awm mek an nih thu a sawi a. Hrangturzo bial MLA Model Village pawh hun reilote ah hriat thuai beisei a nih thu a sawi bawk. Bawrhsap chuan heng Model Village-ah te hian a hranpaa hmasawnna hna thawhna tur sum ruahman bik awm chuang lo tih sawiin, sawrkar hmalakna kallai leh ruahmanna awm mek te entawn tlak taka thawhna tur atana thlan an ni, a ti a. Heng Model Village atana thlanah te hian engkim tha zawka kan kalpui theih nan tuna an dinhmun leh mipuite mamawh dik tak an hriatchian a ngai tih sawiin, Survey uluk taka neih hmasak a tul thu a tarlang bawk.

He hunah hian Serchhip DRDA Project Director leh SAGY Committee-a Member Secretary, Malsawmtluanga chuan an hmalak tawhna chin leh hriat tur tul awm te a sawifiah a, MP Model Village, Khumtung hi SAGY 5th Phase a kalpui tan tura tih a ni a, chu chu kum 2022-2024 inkar a nih thu sawiin, tunah hian lo inhmakhua nan hmalakna bul tan a nih thu a sawi a. MLA te thlan Model Village (VAGY) te erawh chu hmalakna kalpui nghal mai theih a ni tih a sawi a. Hmalak dan tur Plan te chu GPDP Plan mila dahin Line Department te nena khaw tinte mamawh hriatchian hmasak chu hna hmasa a nih thu a sawi bawk.

He thutkhawm ah hian heng Model Village-a Line Department te hmalak dan tur ruahmanna leh hmalak mek awmte chipchiar taka thehluh ran ni se, Model Village-ah te Survey Team, Line Department aiawhte telna tirh thuaia Action Plan rintlak tak a rang lama neih nise an ti a ni.