MZP in hri kai zirlai te tanpuina hlan an rel

Mizo Zirlai Pawl (MZP) General Hqrs. chuan nimin khan Extended Office Bearer Meeting neiin hri leng mek leh ramri-a buaina thleng kaihhnawih an sawiho.

Nimin a MZP hruaitute thukhawm chuan tunhnaia zirlai engemaw zatin Coronavirus hri an kai chu pawi an tih thu sawiin, Zirlaite chu chi-ai mai lova Quarantine Centre-a awm te pawh anmahni enkawltute thuawih taka awm tur leh damdawi te ei tha a dam leh vat turin duhsakna an hlan a. Heng zirlai hri kai mek te hi an mamawh leh a tul anga tanpuina hlan nise an ti.

Assam, Lailapur-a Bangladeshi mi thenkhatin Mizo chhunga ei leh bar, Oil leh thil hrang hrang lut turan dan avanga harsatna thleng mekah Mizoram sawrkarin Tripura State leh Mizoram inkalpawhna kawng a siam tha mek chu lawmawm an tih thu pawh sawiin, Manipur lama chakkhai la tura lirthei a tir lut nghal chu a thlamuan thlak an tih thu leh lawmawm an tih thu pawh an sawi a. Mizo mipui-in harsatna kan tawh mek laia, kan chhehvel State pâwna awm Zofa unau awm hmun hrang hranga mi ten tanpui an inhuam thu thuchhuah hmanga an puangzar te, Mizo mipuite chakkhai la tura Manipur lama kal mek te pawh Zofa chi peng hrang hrang ten lo dawngsawnga an lo tanpuina chu lawmawm an tih thu an sawi a. Kan in unau-na ti nghettu leh tanrual zia tilangtu ah an ngai tih an sawi bawk.