MPF Governing Board thutkhawm neih a ni

Zonuna Kawlni (LENKAWL) • November 19, 2020 • Comments • Mizoram

Mizoram People Forum (MPF) Governing Board thutkhawm vawi 43-na chu nimin khan neih a ni.

MPF Governing Board thutkhawm hi Synod Committee Room No. 1-ah neih niin General Secretary, Rev. R. Lalnuntluanga chuan report pein Political Party te nen thawh-hona thuthlung siamfel a nih tawh thu leh Party tin ten an hming an ziah hnan tawh thu a sawi a. Saitual leh Khawzawl-ah te District Forum hawn a nih thu sawiin, August 2020-ah MPF-a la tello Kohhran te tel tura sawmna thawnchhuah a nih tawh thu a sawi bawk.

He hunah hian kum 2021-2022 atana Budget Rs. 11,63,000/- chu Treasurer Lalram-nghaka chuan pharhin pawm a ni a, kum kal mek 2020-2021 budget aiin Rs. 59,000/- in a tam zawk a ni. Nimin-a MPF Governing Board thu-khawm hian Annual General Assembly 2020 neih tum chu hripui leng vangin thulh nise an ti a, MPF Annual Report leh Thuchah 2020 tihchhuah thung nise an ti bawk.