COVID-19 hri kai 37 hmuhchhuah belh leh an ni

Niminpiah-a Mizoram-a Sample enfiah atangin COVID-19 hri kai mi 37 hmuhchhuah leh an ni a, an zingah hian State pawn atanga rawn lut an awm nual.

Niminpiah khan ZMC Laboratory-ah Sample 583 enfiah niin COVID-19 hri kai 18 hmuhchhuah an ni a, District hrang hranga TrueNat Laboratory-ah Sample 88 enfiah niin hri kai 6 hmuhchhuah an ni bawk a, Rapid Antigen Test hmanga Sample 1454 enfiah atangin hri kai 13 hmuhchhuah an ni bawk.

Niminpiah-a ZMC-a hri kai hmuhchhuah mi 18 te hi Aizawl District-a hri kai hmuhchhuah te vek niin an zinga 9 te chu State pawn atanga rawn lut niin an zinga 8 te chu Force mi an ni a, Ramthar Veng-ah hri kai 6 hmuh niin Dinthar Veng-ah 2 leh Ramhlun Sports Complex-ah hri kai pakhat hmuh a ni bawk.

District hrang hranga TrueNat Laboratory-a hri kai hmuhchhuah mi 6 te hi Serchhip District-ah mi 5 leh Hnahthial District-ah mi pakhat niin an vaiin State pawn atanga rawn lut an ni a. Rapid Antigen Test hmanga hri kai hmuhchhuah mi 13 zinga mi 9 te chu Lawngtlai District mi niin Serchhip District-ah hri kai mi pahnih hmuh an ni a, Chanmari West leh Durtlang Leitan-ah hri kai pakhat ve ve hmuh a ni bawk.

Heti hian nimin thleng khan Mizoram-ah COVID-19 hri kai hmuhchhuah chu 3481 an tling ta a, nimin khan hri kai enkawl mek zinga mi 8 te chu damin anmahni enkawlna hmun atanga chhuahtir an ni a, tun thlengin hri kai enkawl dam 2980 awm tawhin hri kai enkawllai 496 an la awm a, nunna chan mi 5 an awm tawh bawk a ni.

India ramah hri kai 93.52% an dam tawh :

India rama COVID-19 hri kai hmuhchhuah zinga zaa 93.52 te chu enkawl dam ni tawhin hri kai hmuhchhuah zinga zaa 5.01 te chu enkawl mek an ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah COVID-19 hri kai 44,739 te chu enkawl dam leh niin heti hian India rama hri kai enkawl dam zawng zawng chu 83,35,109 an tling ta a, hei hi hri kai hmuhchhuah tawh 89,12,907 atanga chhutin zaa 93.52 an tling a, darkar 24 kalta chhung khan sample 9,37,279 enfiah atangin hri kai 38,617 hmuhchhuah belh leh an ni bawk.

India ramah hian COVID-19 hri kai enkawllai 4,46,805 la awm mekin hei hi hri kai hmuh tawh atanga chhutin zaa 5.01 a ni a, darkar 24 kalta chhung khan hri kai zingah nunna chan 474 awm lehin tun thlengin hri kai zingah nunna chan 1,30,993 an awm tawh a, hei hi hri kai hmuh tawh atanga chhutin zaa 1.47 a ni bawk. India ramah hian tun thlengin sample 12,74,80,186 enfiah a ni tawh a ni.