MNF sawrkar a talbuai mek niin MPCC in an sawi

Mizoram Pradesh Congress Committee (MPCC) chuan sum leh pai enkawlna kawnga hlawhchham MNF sawrkar a talbuai mek niin an sawi.

Thuchhuah an siamah MPCC chuan MNF sawrkarah sum leh pai harsatna a thleng mek nia sawiin, “Sawrkar hnathawk Group A leh B-te hlawh an pe thei lo a, Bill tam tak Treasury-ah a tang mek a, sawrkar hnathawk pension pawisa pawh la thei lo tam tak an awm bawk,” tiin heng te hian sum leh pai enkawlna kawnga MNF sawrkar hlawhchham zia a tarlang chiang hle niin an sawi a. India ram economy tlakhniam dan te, COVID-19 avanga kan buai dante thlirin, Mizoram hian sum leh pai harsatna nasa tak a tawk thei reng a ni tih hi hun engemaw chen atang khan Congress Party chuan a lo hmu lawk tawh nia sawiin, hei vang hian COVID-19 hluar laia sawrkar sum leh pai chet vel dan pawh nasa takin an lo sawisel tawh thin tih an sawi.

Amaherawh chu, MNF sawrkarin Opposition party-te leh mithiamte thurawn a ngaithla duhlo nia sawiin Congress thuchhuah chuan, Congress sawrkar liamta in a budget siam sa atanga vaibelchhe tam tak a hnutchhiahte chu ruahmanna fel nei lovin an hmangral a, an budget siam an hman atang chiahin an buai ta a ni, an ti bawk. Congress Party chuan CSS hnuaia thawkte hlawh chungchangah harsatna awm thin mah se, sawrkar hnathawk nghet hlawh pe thei lo khawpin Mizoram sawrkar hi a la awm ngai lo nia sawiin, Finance Minister thlak a ngai an tih thin chu a dik zia a lang chho zel niin an sawi bawk.