Congress in tangkhang lakchhuah an tum thu sawi

Mizoram Pradesh Congress Committee (MPCC) chuan Silchar-a Mizo Driver thang-khang mek te chu MNF sawrkar in lakchhuah a tum lo zel a nih chuan Congress Party chuan zu lachhuak turin theihtawp a chhuah dawn tih an sawi.

Nimin-a thuchhuah an siamah MPCC chuan a thenawm State zawng zawng nena ramri buai nei Assam chuan nasa takin Mizoram leh ramri depa awm mipuite tan buaina a thlen mek tih sawiin, Assam lamin Mizoram ramri an khar avangin phai lam atanga nitin mamawh lakluh a harsa a, Mizoram-in harsatna kan tawh phah nasa hle tih an sawi a.

Hetihlai hian Silchar-ah Mizo Driver-te kar khat chuang an tangkhang tawh thu leh mi thilpek khawm ringin an awm tawh tih sawiin, hemi kawnga MNF sawrkar hmalak dan chu Mizo mipuite leh tangkhang mekte tan thlamuanpui tham a ni tawh lo tih an sawi a, Assam sawrkar hotuten an mipuite thlavang an hauh nat dante ngaihtuah phei chuan MNF sawrkar hmalakna hi a duhkhawp awm lo hle tih an sawi bawk. Tuna Assam State a sawrkarna chelh mektu BJP chu NEDA lama an thurualpui a nih avanga ramri buai hi Politics khelh tawnna atan an hmang em ni tih chu Mizoram mipui ngaihdan a ni tawh tih pawh tarlangin MPCC thuchhuah chuan, heng Driver tangkhangte hi MNF sawrkar hian lakchhuah a tum lo zel a nih chuan Congress Party chuan zu la chhuak turin theihtawp a chhuah dawn tih an sawi a ni.

Hei bakah hian MPCC chuan ramri buaina chungchangah hian eptu party-te pawhin tanrual hun a ni tih an hriat thu sawiin, sawrkar hmalakna thlawp an inpeih em em laiin sawrkar zawk in eptu party-te thlawpna hi a hnawl tlat avangin tunlai ramri buai chungchangah hian ‘All Party Meeting’ pawh an la ko duh lo niin an sawi bawk.