Mizoram-a Hripui leng karah ni 2 awh tur ‘Virtual Anthurium Festival 2020’ hman a ni

Mizoram Sawrkar in boruak rip tak karah mipuite rilru chhawk zangkhai nan ‘Virtual Anthurium Festival 2020’ a buatsaih chu nimin khan Chief Minister, Zoramthanga chuan a hawng a, ni 2 awh tur he Festival hi Vawiin ah chhun-zawm a zawhfel tur a ni ang.

Virtual Anthurium Festival hawnnaah ah Chief Minister, Zoramthanga chuan he Kut huaihawt a ni chu lawmawm a tih thu sawiin, kum danga Tourist Resort Reiek-a hlawhtling taka lawm thin kha kumin-ah chuan a him thei ang ber leh huap zau bawk si a lawm a lo ngaih tak thu a sawi a. Anthurium par chu kan ram in kan lakluh chawp nimah sela, tun dinhmunah chuan Mizoram thil thar, khaihlak miah lova State pawn a kan hralhchhuah awmchhun anih mai bakah kumhluna par anih avangin eizawnna tha tak a nih thu a sawi a. Mizoten hetiang khawpa kan hmingthatpui leh hlawkpui Anthurium pangpar chu Kut a chantir anih tak thu leh mipui ten an hlut ve ngei a beisei tih thu a sawi bawk.

He hunah hian Khualzahawm Tourism Minister, Robert Romawia Royte chuan COVID-19 boruak kara Tourism Department lamin hmalakna a neih chi hrang hrangte he hunah hian a tarlang a, zin veivah leh mipui punkhawm tun dinhmunah a rem loh avangin Media partner hrang hrang te leh Social Media kaltlangin livestream a ni ta tih a sawi bawk.

Nimin-a he hun hmanna ah hian Tourism Department Commissioner & Secretary, Esther Lai Ruatkimi chuan thu hmahruai sawiin, he programme hi Ministry of Tourism, Govt. of India in a bika Festival hmanna min pek anih angin a thei leh remchang apiang ten mahni In lum atanga lo thlir theuh turin a sawm a ni.

Sawrkar thuchhuah in a tarlan danin Tourism Department chuan Sawrkar in SOP a chhuah bawhchhe lovin he Virtual Festival hi a buatsaih a, Mizoram-a zaimi lar tak tak te leh Band ten mipui an awih bakah Traditional Costume Show te leh Hnam Lam te en theih in an siam a ni. He Kut hi kum dangah chuan October thatir a neih thin ni mahse kan hun tawnin a zirloh avangin November thla-ah boruak ngaichang reng chunga huaihawt a ni ta a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn