Mizoram-ah hri kai 32 hmuh belh leh an ni

Niminpiah khan Mizoram-ah COVID-19 hri kai mi 32 hmuh belh leh niin hri kai hmuhchhuah zinga a tam ber te hi Aizawl khawpui huamchhung ami an ni a, tun thlenga hri kai hmuhchhuah chu mi 2990 an tling tawh.

Niminpiah khan ZMC Laboratory-a Sample enfiah 885 atangin hri kai mi 21 hmuhchhuah an ni a, Aizawl Kanan Veng-ah hri kai mi 6 hmuh niin Dinthar-ah mi 5 hmuh an ni a, Zemabawk Venglai ah hri kai mi 3 hmuh niin Tlangnuam leh Zemabawk-ah hri kai pahnih ve ve hmuh an ni a, Zarkawt, Mission Veng leh Ramthar-ah hri kai pakhat theuh hmuh an ni bawk.

Niminpiah vek khan Rapid Antigen Test hmanga Sample enfiah 444-ah hri kai 10 hmuhchhuah niin an zinga 7 te chu Aizawl khawpui chhunga hri kai hmuhchhuah a ni a, hri an kaina chhui mek an ni. Heng hri kai hmuh zinga mi 4 te chu Chanmari West mi niin Chhinga Veng, Dawrpui leh Ramhlun Vengthar mi an ni. Heng bakah hian Champhai District-ah tualchhung-a hri inkaichhawng pahnih hmuhchhuah niin Lawngtlai-ah hri kai pakhat hmuh a ni bawk. District hrang hranga TrueNat Laboratory-ah niminpiah khan Sample 79 enfiah niin hri kai pakhat hmuh a ni bawk a, hri kai hmuhchhuah chu Champhai Kahrawt Veng mi niin tualchhung a hri inkaichhawng a ni bawk.

Nimin khan Mizoram-ah hri kai mi 12 enkawl dam leh niin heti hian nimin thleng khan Mizoram-a hri kai hmuhchhuah chu mi 2990 an ni ta a, an zinga mi 2485 te chu enkawl dam ni tawhin hri kai enkawllai mi 503 an la awm mek a, hri kai zingah nunna chan mi pahnih awmin hri kai zinga zaa 83.11 te chu enkawl dam an ni tawh a ni.

India-ah hri kai enkawl dam an pung zel :

India rama COVID-19 hri kai hmuhchhuah zingah zaa 92.32 chu enkawl dam ni tawhin hri kai hmuhchhuah atangin zaa 6.16 te chu enkawl mek an ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah COVID-19 hri kai mi 54,157 te chu enkawl dam leh niin tun thlengin mi 77,65,966 te chu enkawl dam an ni ta a, hei hi hri kai hmuhchhuah zawng zawng atanga chhutin zaa 92.32 an tling tawh a ni.

Darkar 24 kalta chhungin India ramah sample 12,20,711 enfiah niin hri kai 47,638 hmuh leh an ni a, tun thlengin India ramah sample 11,54,29,095 enfiah ni tawhin hri kai hmuh tawh zawng zawng chu 84,11,724 a, tunah hian hri kai enkawllai 5,20,773 la awmin hei hi hri kai hmuhchhuah atangin zaa 6.19 a ni a, hri kai zingah nunna chan mi 1,24,985 awmin hei hi hri kai hmuhchhuah atangin zaa 1.49 a ni bawk a. Darkar 24 kalta chhung khan nunna chan mi 670 an awm bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn