Hri kai 3090 hmuh a ni ta

Inrinni-a Mizoram-a Sample enfiah atangin COVID-19 hri kai mi 57 zet hmuhchhuah leh niin Mizoram-a hri kai hmuhchhuah chu 3090 an tling ta.

Inrinni khan ZMC Laboratory-ah Sample 887 enfiah niin heng atang hian hri kai mi 53 hmuh niin an vai hian Aizawl District-a Sample lak vek an ni a, an zinga mi 6 te hi State pawn atanga rawn lut niin a bak zawng hi hriat theih chinah tualchhung-a hri inkaichhawng an ni thung. Aizawl Dinthar Veng-ah hri kai hmuh tam berin mi 9 hmuh an ni a, Salem Veng-ah mi 7 leh Ramhlun Sports Complex leh Ramhlun Vengthar-ah hri kai mi 6 ve ve hmuh an ni bawk. Heng bakah hian Ramhlun South-ah 4 leh Chan-mari West-ah 3 hmuh niin a dang hi Veng hrang hrang ah 2/1 hmuhchhuah an ni bawk.

Inrinni khan Mizoram District hrang hranga TrueNat Laboratory-ah Sample 94 enfiah niin hri kai hmuhchhuah an awm lova, Rapid Antigen Test hmanga Sample 401 enfiah ah hri kai 4 hmuhchhuah niin Lawngtlai District-ah hri kai mi 3 hmuh niin State pawn atanga rawn lut, Company hnuaia thawk an ni a, Champhai District-ah hri kai mi pakhat hmuh niin tualchhung a hri inkaichhawng a ni thung.

Nimin khan Mizoram-a hri kai enkawl mi 92 zet chu enkawl dam leh an ni a, heti hian nimin tlai thlenga Mizoram-a hri kai chu 3090 niin mi 2618 te enkawl dam an ni tawh a, hri kai enkawllai 470 la awmin nunna chan mi 2 an awm a, zaa 84.72 enkawl dam an ni tawh a ni.

S Nimin thleng khan India ramah hri leng vangin sample 11,77,36,79 enfiah ni tawhin hri kai hmuh zawng zawng chu 85,07,754 an tling tawh a, heng zinga mi 78,68,968 te chu enkawl dam ni tawhin hei hi hei kai hmuhchhuah atangin zaa 92.49 a tling tawh a, tunah hian hri kai enkawllai 5,12,665 la awmin hri kai hmuhchhuah atangin zaa  6.03 a ni thung a. Hri kai zingah nunna chan 1,26,121 awmin darkar 24 kalta chhungin mi 49,082 chu enkawl dam leh an ni bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn