Bairabi Rel chawlhhmun chu Rel hmanga lirthei phurhluh a nih theih nan thawmthat a ni

Food, Civil Supplies & Consumer Affairs Minister, K. Lalrinliana chuan nimin khan Bairabi Rel Chawlhhmun leh Bairabi leh Kanhmun inkar kawng thawmthat hna kalpui mek te chu a hmunah tlawhin, Bairabi Rel chawlhhmun chu Rel hmanga lirthei phurhluh a nih theih nan thawmthat a nih thu a sawi.

Supply Minister ni bawk, K. Lalrinliana hian Bairabi Rel chawlhhmun a tlawhnaah hian ramri a buaina avanga mipui mamawh chawkluh kawnga harsatna awm thei chinfelna turin ruahmanna hrang hrang siam a nih hnuah Bairabi Rel chawlhhmun chu Rel hmanga lirthei phurhluh a nih theih a thawmthat a nih thu sawiin, he hmalakna hian nakin zel a nitin mamawh chawkluhna kawngah hmanraw tangkai tak a ni ngei a beisei thu a sawi a. Motor te hi Rel hmanga phurhluh (Roll on/roll off) tur a ni a, Rel Wagon-a Motor lawn kaina leh tlan thlakna tur dawhsan (ramp) hi FCS&CA Department hmalaknaa ngawrh tak a siam niin Vawiin hian enchhin tura peihfel hman beisei a nih thu thawktute hian Minister hi an lo hrilh a ni.

Supply Minister hian Kanhmun leh Damcherra inkalpawhna Lei thawmthat mek chu a hmunah tlawhin he Lei hi peihfel a nih chuan ei leh bar piah lamah insumdawntawnna hmun pawimawh tak a la nih tur thu a sawi a. Sawrkar ruahmanna hnuaia thawktu ten theihtawp chhuaha hma an lakna ah lawmthu a sawi bawk a ni. He Lei thawmthatna hmunah hian Minister hi PWD Chief Engineer (Highways), Er. Bowman leh a thawhpui ten lo dawngsawngin Langkaih lei thawmthat mek chu tluang taka kalpui a nih chuan kar hnih (2) hnuah peihfel a beiseiawm thu an sawi a ni.

Mizoram chak lakna kawngpui dan a nih hnuah Tripura lam atanga Mizoram mamawh lalut turin ruahmanna chak taka kalpui mek a ni a, hemi atana pawimawh Bairabi leh Zamuang inkar kawng thawmthat hna hi ngawrh taka thawh niin helai kawng hi KM 23 vela thui niin a chhe zualpui thawmthat ngai hi KM 7 ang vel a chhut a ni a, Teirei lui leh Langkaih lui te kal-tlangin heng lui-a Lei awmsa te chu thawm-that a ngai bawk a. Heng hna hrang hrangte hi PWD Kolasib Division, Kawrthah Division, NH. Division-I, NH. Division-V leh Mamit Division te bakah Lei siam hna bik hi Mechanical Division, Aizawl ten an thawk mek a ni.

Nimin heng hmalakna hrang hrang tlawhtu Supply Minister hian hnathawktute ei leh in man atan sumfai a hlan bakah Kanhmun a Police duty te tan sumfai a hlan nghal bawk a ni.