Chanchin thar thenkhat :

Chief Minister sawipui

Nimin khan Vairengte Joint VC hruaitute chuan Chief Minister, Zoramthanga chu a Pisa-ah hmuin, ramri ah a hmuna thil thleng dan chung-chang an sawiho. Nimin-a an inkawmna ah hian Chief Minister chuan Vairengte Joint VC hruaitute ten ramri hrul a khua ten harsatna an tawh hrang hrang an thlen chu a lo ngaihthlak sak a. Chief Minister chuan boruak tha leh muanawm a awm chhoh zel theih nan hmalak mek zel a nih dan te sawiin, theihtawp chhuahin sawrkar in a tih tur ang te chu a tih chhunzawm zel tur thu a sawi a ni. Nimin vek khan ramri chungchangah Chief Minister chu a Office ah Central YMA hruaitute nen inkawmna hun an nei bawk.

MSO dinchampha hmang

Mara Students' Organisation (MSO) chuan nimin khan an dincham vawi 55-na pualin vantlang hmun an tifai a, MSO dinchampha hi hri leng avangin kumdang anga hman theih a nih loh avangin hetiang hian hun hman niin Home hrang hrang leh District Jail-ah te thilpek hlan a ni bawk. Mara Students Organisation hi kum 1965 khan Shil-long ah din a ni a, S. Hiato chu President hmasa ber atan thlan a ni. Tun dinhmun ah Siaha District-ah Sub-Hqrs. 7 leh Mizoram pawna Sub-Hqrs. 2 neiin Aizawl leh Delhi-ah Joint Hqrs. an nei bawk a ni.

Myanmar-ah inthahna thleng

Myanmar leh Mizoram inrina bul Myanmar ramchhunga awm Rikhawdar khua ah niminpiah tlai khan Sethanga (28), Myanmar-a Mindat khua, tuna Khawmawi-a a cheng mek chuan Kaphlei-pianga, MRTV-Sub. Emission Department Incharge hnathawk chu a Pisa-ah len chilhin kut a thlak hnuah a lu a tan sak a. Rihkhawdar YMA President, Vensiangmunga sawi danin Sethanga hian Kaphlei-pianga hi kangthelhna hmangin in a lu-a vawi 3 a vuak hnuah a lu hi a tan a, Kaphleipianga Kawl pawnfen hmanga a lu funin a chhuahpui hnuah Kaphleipianga nupui hian lo hmuin a bulhnaia awm Myanmar sipai ten Sethanga hi an man nghal a ni.

HPC Party inthlanna nei dawn

Hmar People’s Convention (HPC) Party Pre-sident thlanna chu Vawiin hian neih a ni dawn ta a, ruahman lawk angin Sakawrdai, Ratu, Zohmun, Suangpuilawn, Khawlian leh Siphai-ah Vote thlakna hmun siam a ni ang. He inthlanna neih turah hian Vote nei mi 302 an awm dawn a, zing dar 9:00 atanga chhun dar 12:00 thleng Vote thlakin chawhnu dar 1:00-ah Vote tla te chhiarin chhiar zawh a nih veleh result puan nghal a ni ang. He inthlanna hi mi pathum in an chuh dawn a ni.

YMA in kawng siamte pui

Assam lam atanga Mizoram lam panna kawng dan avanga Mizoram Sawrkarin Tripura atanga chak lakna tur kawngpui thawmthat hna a thawh mekah nimin khan Taitesena Group YMA ten Bairabi leh Zamuang inkara an huam-chhunga kawng siamthat hnathawh mek hi hnatlang-in an pui a, he hnatlang-ah hian mi 200 vel thawkchhuakin bialtu MLA, Lalrindika Ralte chuan hnatlangte ei tur lei nan Rs. 5000/- a pe a ni.

ZoRO in lawmawm an ti

Zo Reunification Organisation (ZoRO) chuan Assam leh Mizoram ramri buaina leh a kaihhnawih buaina awm mekah Zofa hnam hrang hrang leh pawl hrang hrang ten Mizoram leh Mizoram-a an unaute an thlawp zia kawng hrang hranga an tilang chu lawmawm an tih thu nimin khan thuchhuah siamin an tarlang a. Hetianga Zofa zawng zawngte kan in lainatna leh kan in thlâwpna kan tilang hian Zofate inpumkhat zia a ti langchiang em em nia sawiin, khawi hmuna Zofate pawhin eng harsatna pawh kan tawhin hetiang taka kan in hmangaihna kan lantir zel hi Zofate rorelna pakhat hnuaia kan awm hun tur kan ngahhlelhzia lanna pakhat ah an ngaih thu leh lawmawm an tih thu an sawi bawk.

Hetiang taka kan in hmangaih reng chuan engtik hunah emaw chuan Hnam-a min dintu Pathian hian rorelna pakhatah min la hruai-khawm ngei ang tih a rinawm tih ZoRO chuan sawiin, chu hun chu a hnai ta niin a lang tiin an thuchhuah ah chuan an tarlang bawk.