Mizoram-ah COVID-19 hri kai mi 6 hmuh leh an ni

Nimin khan Mizoram-ah Sample enfiah zat tlahniamin hri kai hmuhchhuah pawh an tlem viau a, Mizoram-a hri kai hmuhchhuah zawng zawng chu 3096 an tling tawh.

Niminpiah khan Mizoram pumah COVID-19 hri kai hmuhchhuah thar mi 6 an awm a, heng hri kai hmuhchhuah thar te hi Rapid Antigen Test hmanga hri kai hmuhchhuah te vek an ni. Niminpiah a hri kai hmuhchhuah thar mi 6 zinga pathum te chu Aizawl khawpui chhunga mi niin Chanmari West, Electric Veng leh Ramthar Veng mi te an ni a, hei bakah hian Mamit District-ah Hriphaw khua mi, Assam atanga lo haw leh Kolasib District-ah BSF Sipai, State pawn atanga rawn lut mi 2 hmuh an ni bawk. Heng BSF sipai hri kai hmuh-chhuah te hi tunhnaia ramri-a Duty tura rawn kal te niin khawpui chhunga Bazar-a rawn kal te zing ami an nih loh thu Kolasib DC chuan a sawi.

Niminpiah khan ZMC Laboratory-ah Sample Test a awm lova, Lawngtlai leh Saitual District-ah Rapid Antigen Test hmangin Sample 52 enfiah niin hri kai hmuh an awmlo bawk a ni.

Heti hian nimin thleng khan Mizoram-a hri kai hmuhchhuah chu mi 3096 an tling ta a, heng zinga mi 2637 te chu enkawl dam ni tawhin tunah hian hri kai enkawllai 457 an la awm mek bawk a. Nimin khan Mizoram hmun hrang hranga hri kai enkawl dam mi 19 te chu anmahni enkawlna hmun atanga chhuahtir an ni bawk.

Hri kai hmuhchhuah atanga zaa 92.56 dam tawh :

India rama COVID-19 hri kai enkawl mek chu hri kai hmuhchhuah tawh atanga chhutin zaa 5.96 an ni a, tunah hian hri kai hmuhchhuah zinga zaa 92.56 te chu enkawl dam an ni tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah COVID-19 hri kai 45,903 hmuhchhuah thar leh niin heti hian India rama hri kai hmuhchhuah zawng zawng chu 85,53,657 an tling ta a, darkar 24 kalta chhung khan mi 49,082 te chu enkawl dam leh niin tun thlenga hri kai enkawl dam chu 79,17,373 an tling tawh bawk a, hei hi hri kai hmuhchhuah atangin zaa 92.56 a ni tawh a ni.

Tun dinhmunah India ramah hri kai enkawllai 5,09,673 an la awm a, hei hi hri kai hmuhchhuah zawng zawng atanga chhutin zaa 5.96 a ni bawk. India ramah hian darkar 24 kalta chhung khan hri kai zingah nunna chan mi 559 an awm leh a, heti hian tun thlenga hri kai zinga nunna chan chu 1,26,611 niin hei hi hri kai hmuh atanga chhutin zaa 1.48 a ni bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn