Chanchin thar thenkhat :

Hmalakna lawmawm ti

Nimin khan School Education Minister, Lal-chhandama Ralte hovin a Office-ah Transport Minister TJ. Lalnuntluanga leh Serlui bialtu MLA, Lalrinsanga Ralte bakah MZP General Hqrs. hruaitute chu an thukhawm a, he hunah hian MZP General Hqrs. President, B. Vanlaltana chuan Silchar Mizoram House-a Mizo tangkhang te leh bungraw thenkhat tangkhang lo chhuah theihna tura Sawrkar hmalakna chu lawmawm a tih thu sawiin, chutihrual chuan tuna IR awmna hmun chu chhuahsan lo tur leh a theih ang anga ramri ngaihsak turin a ngen bakah ramri hrul ah hmasawnna (development) pawh sawrkarin nasa lehzualin kalpui se a duh thu a sawi bawk. He hunah hian Minister leh MLA te pawhin ramri chungchanga MZP hmalakna chu chhuanawm an tih thu an sawi bawk.


Vawiin ah Anthurium Festival

Mizoram Sawrkar chuan kan boruak rip tak karah mipuite rilru chhawk zangkhai nan ni hnih awh ‘Virtual Anthurium Festival 2020’ chu Vawiin leh naktuk hian a buatsaih dawn tih sawrkar thu-chhuah chuan a tarlang a, hri leng avangin LPS, Zonet, DDK te leh Social Media Youtube, Facebook leh Instagram kaltlangin Virtual Anthurium Festival hi livestream a pekchhuah tum a ni. Hetihlai hian ZPM Thalaite chuan COVID-19 avânga khawvel a buai laia MNF sawrkârin Anthurium Festival a huaihawt chu nuam tawl sawrkar hmalakna a ni tih sawiin, State hrang hrangin hri vânga mi harsa zawkte chhawmdawlna kawnga chet an lak uar em em laia, kan sawrkarin a nuam tawl zawnga sum khawhralna tur ringawt a lo zawng chu vanduaithlak an tih thu an sawi bawk.


MKHC in mipuite an chah

Mizoram Kohhran Hruaitute Committee (MKHC) chuan Mizoram leh Assam inkar ramri buaina chu mipuiten inpumkhatna tha neih nan hmanga, mahni hamthatna um lova, tawrh a tul pawha chhel taka tuara, sawrkar thlawp turin mipui an chah.


Tlanchhe thil tih ah ngai

PC Party chuan Chief Minister hova sawrkar mi pawimawh te thukhawmin Vairengte-a Mizo-ram Police awmna thlang lawkah BSF duty-na tura ruahmanna a siam ta chu tlanchhe thil tih ah an ngai tih sawiin, kan ramri chin dik tak, Dholai hmunah ngei ramri venghimtu sipai dah zawk turin Mizoram sawrkar an phut thu an sawi.


MCAB Chairman in hlan

Mizoram Co-operative Apex Bank Ltd. leh Mizoram Agriculture Marketing Solution (MAMSol)-a Chairman, T. Lalmuanpuii chuan nimin khan Bairabi - Gharmura kawng danpin avanga hnamdang nen intlawhpawhna veng-a duty te leh Bairabi Zophai-a Duty te tlawhin an thingpui in na tur pawisafai a hlan.


LADC-ah MDC thlang dawn

Mizoram State Election Commission chuan Lai Autonomous District Council (LADC)-a Member of District Council (MDC) thlanna chu December 4, 2020-a nei turin hriattirna a tichhuak. Nimin-a SEC in thuchhuah a siamah chuan nimin a inthlanna neih tur puanchhuah a nih rual hian Returning Officer in inthlan hriattirna a tichhuak nghal a, MDC bial 25-ah inthlanna hi neih tur niin tun thla ni 20 chawhma dar 11:00 atanga chawhnu dar 3:00 thlengin inthlanna chuh tumte tan Nomination Paper thehluh theih a ni ang. Hemi ni tlai lamah Nomination Paper te hi enfiah nghal niin Nov. 23 thleng inhnuhdawhna hun hawn a ni anga, December 4, 2020 zing dar 7:00 atanga tlai dar 4:00 thlengin mipui ten Vote an thlak dawn a ni. He inthlanna a Vote tla te hi Dec. 8, 2020-ah chhiar a ni ang.


Nasa zawka hmalak rel

Lunglei-a lirthei neitu pawl hrang hrang leh Chhimbial Chhantute nimin-a thukhawm chuan Mizoram chhimlam-a lirthei zawng zawng tan Aizawl pan kher ngai lova lirthei chungchang thil pawimawh hrang hrang an tihfel theihna tur Regional Transport Authority din tura sawrkar an ngenna chu tun thlenga tih hlawhtlin a la nih loh avangin nasa zawka hmalak nise an ti.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn