Mizoram-ah COVID-19 hri kai mi 25 hmuh leh an ni

Niminpiah-a Mizoram-a Sample enfiah zingah COVID-19 hri kai mi 25 hmuhchhuah leh niin tunhnaia hri kai hmuhchhuah dan thlirin hri kai hmuhchhuah hi an tlahniam hret a ni.

Niminpiah-a Mizoram-a COVID-19 hri kai hmuhchhuah mi 25 zinga a tam zawk te erawh hi chu Aizawl District-a hri kai hmuhchhuah an ni leh a, ZMC Laboratory-a Sample enfiah 546 atangin hri kai mi 14 hmuh niin Aizawl Dinthar Veng ah hri kai mi 4 hmuh leh niin an vengchhung ah hian hri kai mi 80 zet hmuh an ni tawh a. Dam Veng-ah hri kai 2 hmuh leh niin Bawngkawn, Chhinga Veng, Mission Veng, Zotlang, Tuikual North, Chaltlang, Electric Veng leh Upper Republic Veng atangin hri kai pakhat theuh hmuh an ni bawk.

Nimin khan Mizoram-ah Rapid Antigen Test hmangin Sample 333 enfiah niin hri kai mi 11 hmuh an ni bawk a, Aizawl District-ah mi 3 hmuh niin pakhat hi State pawn atanga rawn haw a ni a, midang pahnih hi BSF mi leh sa an ni thung. Kolasib District-ah hri kai mi 3 hmuh niin 1st IR Batallion mi leh sa, Bihar inthlan Duty-a kal rawn haw te an ni a, Lawngtlai District-ah hri kai mi 5 hmuh ni bawkin Lawngtlai Vengpui-II a cheng vek niin tualchhung-a hri inkaichhawng an ni bawk. Niminpiah khan District hrang hranga TrueNat Laboratory-ah Sample 80 enfiah niin hri kai hmuhchhuah erawh an awmlo thung.

Nimin khan Mizoram-ah COVID-19 hri kai mi 51 te enkawl dam niin chhuahtir leh an ni a, heti hian Mizoram-a hri kai hmuhchhuah chu 3242 niin mi 2739 te enkawl dam an ni tawh a, tunah hian enkawllai 501 la awmin nunna chan mi 2 an awm tawh a ni.

India-ah hri kai enkawllai an tlem zel :

India ramah COVID-19 hri kai enkawllai 4,89,294 la awmin hei hi hri kai hmuhchhuah zawng zawng atanga chhutin zaa 5.63 a ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah hri kai mi 52,718 enkawl dam leh an ni a, heng te nen hian tun thlenga hri kai enkawl dam chu 80,66,501 an tling tawh a, hri kai hmuhchhuah atangin zaa 92.89 te chu enkawl dam an ni tawh a ni.

Darkar 24 kalta chhung khan India ramah Sample 11,93,358 enfiah leh niin hri kai 47,905 hmuhchhuah an ni a, heng te nen hian India rama Sample enfiah zawng zawng chu 12,19,62,509 niin hri kai  hmuh zawng zawng pawh 86,83,916 an tling ta a. Tunah hian hri kai enkawllai 4,89,294 awmin hri kai enkawllai zat hi a tlahniam zawngin a kal mek zel a ni. Darkar 24 kalta chhung khan India ramah hri kai nunna chan mi 550 awm lehin tun thlengin hri kai nunna chan 1,28,121 an tling tawh a, hei hi hri kai hmuhchhuah atanga chhutin zaa 1.47 a ni bawk.