Lockdown laia a thlawna thlai thar sem Mizo zia dik tak a nih thu Cooperation Minister in a sawi

Cooperation Department Minister, C. Lalrinsanga chuan Lockdown hmasa lamah Veng leh khaw thenkhat thahnemngai ten a thlawna an thlai thar te an sem chhuah te kha Mizo zia dik tak a nih thu a sawi.

Tunhnaia thlai man sang thut avanga mipui ten harsatna an tawh te sukian a nih theihna tur chungchang ngaihtuaha nimin-a a Pisa-a thutkhawm neih ah he thu hi sawiin Cooperation Minister, C. Lalrinsanga chuan tunhnai ramri buai avanga Mizoram a motor lut tur hun engemaw chen danchah a ni karah leh COVID-19 hripui leng kara loneitu (farmer) ten man tlawm taka an thlai thar an hralh laia, kharchhawng (middle man) ten man sang tak tak, harsa leh rethei zawk - consumer tam takte ngaihtuah lova thlai man an ti sang chu an dem awm tih a sawi a. Lockdown hmasa lamah Veng leh khaw thenkhat thahnemngai ten a thlawna an thlai thar te an semchhuah te kha Mizo zia dik tak a ni tih sawiin, “Tunhnai lockdown-a thlai man sang ta thut erawh Mizo zia kan kalsan ta deuh em ni?” a ti a, Sawrkar chuan thlai man to ta thut chu pawi a tiin, loneitu te leh consumer te insuihzawmna tha zawk ruahmanna siam a ni ang, a ti.

Cooperation Minister chuan mipuite harsatna sukiang turin State danga an lo kalpui tawh- Aapna Mandi, Rythu Bazar te zirchianga, Mizoram-ah introduce theih a nih nan hmalak a nih tur thu a sawi bawk a. State dang atanga a tlem thei ang ber thlai thar lakluh a nih theih nan intodelh a pawi-mawh a, hemi atan hian sawrkar department hrang hrang tan ho (cooperate) a ngai tih a sawi bawk.

He Meeting hian tunhnaia thlai thar man sang ta thut chungchangah a tul anga ruahmanna lo siam turin Vegetable Supply Chain Committee ruat ni se an ti a, he Committee member te hian Vawiin-ah thutkhawm an nei nghal dawn a. Hei bakah hian thlai hralh chungchanga kalphung thar, MIZOFED, TRIFED te nen tangkawpin ngaihtuah leh nise an ti bawk.

Nimin a Minister hova thutkhawm ah hian Minister hi Cooperative Development Board Vice Chairman, H. Biakzaua leh Horticulture Development Board Vice Chairman, Prof. F. Lalnunmawia ten tawiawmin Horticulture Department, Trade & Commerce Department, Agriculture Department, Food & Civil Supply Department aiawhte leh midangte an tel a ni.