Latest News

Chanchin thar thenkhat :

Phainuam-ah Hnamchhan Hnatlang neih a ni

Phainuam khawtlang hmeichhia te chuan nimin khan ‘Hnamchhan Hnatlang’ koin Mizoram chhung an luah chinah kal kuali an au rual a, Branch YMA, Vairengte Block MHIP leh MZP Sub-Hqrs. hruaituten an tawiawm a ni. Nimin a Hnam chhan hnatlang-a chhuak tehi Vairengte SDPO leh sipai ten an veng a. Buarchep phai a Assam LPS School bomb puahna hmuna Duty SSB (Central Police) ten lo dang mahse, Phainuam hmeichhia te hian tawn tlang luiin Mizo te luah chin ramah dingin, Mizo leh Hindi tawngin ‘Kan dinna hi Mizoram a ni, kan thih thlengin Mizoram tan kan ding zel ang, Bangladeshi raltlan te vanga kawngpui dan anih fo a, central sawrkar in min ngaihsak lo fo chuan Independent kan puang ang’ tiin an aurual a ni. 


Ramri kaihhnawih ah ramri tlawh rihlo turin ngen

Vairengte leh Saihapui ‘V’ Joint VC chuan Mizoram leh Assam sawrkar ten ramri buaina chingfel tura an thawhna avanga boruakin ziaawm lam a pan tan nia an hriat avangin ramri kaih-hnawih ah mimal leh pawl hrang hrang te chu ramri lam a kal tawh rihlo turin an ngen. Vairengte leh Saihapui ‘V’ Joint VC te chuan Mizoram leh Assam ramri buaina chungchangah Zoram mipui thlawpna an dawng nasa chu lawmawm an tih thu an sawi a. Party hrang hrang, NGO leh mimal ten sum leh tha thawh-a ramri humhalh tura an puihna ah leh sawrkar hmalakna ah te an lawm takzel tih an sawi a. Hetih rual hian State pahnih te inbiakna avanga boruakin ziaawm lam a pan chho nia a lan avang leh hri leng mek avanga mipui lo him zawk nan ramri chungchang ah mimal leh pawl hrang hrang te chu Vairengte leh Saihapui ‘V’ a kal tawh rih lo turin an ngen a ni. 

Hetihlai hian nimin lamah ramri hrula boruak a muanawm a, Vairengte paltlangin Non-Essential Commodities phur lirthei 9 te chu an rawn lut leh tawh bawk a ni.


Bank te hmalakna thlirlet

Champhai District Consultative Committee (DCC)/District Level Review Committee (DLRC) thutkhawm chu nimin khan Champhai DC Conference Hall-a neih niin he hun hmanpuitu Champhai DC, Maria CT. Zuali chuan ram sum pai dinhmun siamthat kawngah Bank loan pek-chhuah chuan awmzia a nei thui hle tih sawiin, Bank a sum dahluh leh pekchhuah khaikhinna, Credit Deposit Ratio inthlau lutuk chu ngaih-mawhawm a tih thu a sawi a, Credit Deposit Ratio tha zawk nei thei turin Bank-te chu inhawng leh zual turin a chah bawk. Champhai District Bawrhsap chuan mitinte banphak-a Banking facilities chhawp a tul thu pawh sawiin, Bank kaltlanga hamthatna awm te a dawng tur ten an dawn theih ngeina turin zau zawka inzirtirna kalpui a tul takzet a ni, a ti bawk. He huna tarlan anih danin kumin June 2020 Quarter zawh thlenga Champhai District-a Bank hrang hranga pawisa dahluh leh pekchhuah khaikhinna Credit Deposit (CD) Ratio chawhrual chu 42.43 % a ni.


Electric Bill tihniam dawn

Sawrkar Laipui-a Ministry of Power thupek anga GENCOM ten kawlphetha leina man rebate a pekna atangin November thla electric Bill chu Consumer tin te tan tihhniam a ni dawn. Hemi chungchanga sawrkar thuchhuah tarlan danin COVID-19 hripui leng vanga Ministry of Power thupek anga GENCOM ten kawlphetha leina man, cheng vbc. 7.52 a rebate chu Consumer tin te Electric Bill atangin paih tur a ni a. Electric bill hi November thlaa hman, December Bill pek tura Contracted load atangin 1kW zelah Rs. 201.67 in tih tlem tur a ni. Hei hian kumin August hnu lama Connection la thar te a huam lo ang. 


SHG te tan Loan semchhuak

Mizoram Rural Bank Tuipang Branch leh Mizoram State Rural Livelihoods Mission Tipa RD Block te chuan nimin khan an huamchhung Village Organisation 25 hnuaia Self Help Group te tan Loan cheng nuai 120 an semchhuak.


Tuirial bial-ah thlai chi sem

Tuirial bialtu MLA, Andrew H. Thangliana chuan nimin khan tunlai hrileng avanga mipuiin harsatna an tawh avangin tunhnai khan a bial chhung Lungdai, Serkhan, Nisapui, Lungmuat, North Chal-tlang-I leh II bakah Bukpui khua-a thlai chingtute hnenah thlai chi chi hrang hrang a sem a, State kan nihna pawh kum 34 lai ni tawh si in engkimah kan la intodelh loh zia COVID-19 vang emaw, ramri chungchanga Lailapur kawng Block ringawtah pawh a chiang tih sawiin, intodelh tura hmalak a tul takzet tih a sawi. Hei bakah hian tunhmaa la thleng ngailo, ram rorelna In sang ber ah mahni MLA pui te ban tura hêkna hial kan ram ah a thleng ta chu pawi a tih thu leh a dem thu pawh sawiin, “Tuna ramri buaina leh ei leh bar-a harsatna kan tawh mêk hi, an mi hêk Pu Lalduhoma hruaina hnuaia awm ni ta zawk ila a thlen ka ring lo,” a ti bawk


MNF Thalai in lawmawm ti

MNF Thalai, Mizo National Youth Front (MNYF) chuan hun engemaw chen Assam State chhunga kawngpui dan chah avanga Silchar Mizoram House-a Mizoram lirthei tangkhang ten sawrkar hotute ruahmanna fel tak avanga himdam tak leh tluang taka Mizoram an rawn lut thei ta chu lawmawm an tih thu thuchhuah siamin an tarlang a. Mizoram leh Assam ramri dep buai chungchanga sawrkar chet dan chu chhuanawm an tih thu pawh tarlangin, “Tun hma sawrkar hmasa lama kan la hmuh ngai loh a nih avangin kan ram tan pawh a chhinchhiah-tlak hlein kan hria a, a bik takin kan Chief Minister leh Home Minister huaisen takte hma-lakna vang a ni a, kan chhuang hle a ni,” tiin Police/IR taima leh huaisen taka ram tana an hna-thawh chhuanawm an tih thu an sawi bawk.

Comments

Popular News (Last 30 Days)