Mizoram-ah COVID-19 hri kai 25 hmuh belh leh an ni

/

Inrinni-a Mizoram-a Sample enfiah atangin COVID-19 hri kai mi 25 hmuhchhuah leh an ni a, Mizoram-a hri kai hmuhchhuah zawng zawng chu 3393 an tling tawh a ni.

Inrinni khan ZMC Laboratory-ah sample 341 enfiah niin heng atang hian hri kai 20 hmuhchhuah an ni a, n vai hian Aizawl District-a Sample lak vek an ni. Hri kai zingah hian State pawn atanga hnathawk tura rawn lut Shivalaya Construction Company hnuaia thawk mi 8 leh Thingsulthliah BRO Camp-a awm mi 4 an tel a ni. Heng bakah hian Aizawl Tlangnuam Veng-ah hri kai 3 hmuh niin Zotlang leh Ramhlun Vengthar-ah hri kai 2 ve ve hmuh an ni a, MINECO-ah State pawn atanga rawn lut hri kai pakhat hmuh a ni bawk.

Inrinni vek khan Rapid Antigen Test hmangin Mizoram-ah Sample 152 enfiah niin hri kai mi 4 hmuh an ni bawk a, Lawngtlai-ah tualchhunga hri inkaichhawng pahnih hmuh niin Lunglei-ah pakhat hmuh a ni bawk a, Aizawl Saron Veng mi, LRM Hospital-a inentir tura kal chu hri a kai tih hmuhchhuah a ni bawk.

District hrang hranga TrueNat Laboratory-ah Inrinni khan Sample 84 enfiah niin hri kai pakhat hmuhchhuah ni bawkin Serchhip District-a hri kai hmuhchhuah niin State pawn atanga hnathawk tura rawn lut leh Company hmun-a inkhunghrang mek a ni thung.

Hetihlai hian Zirtawpni khan Mizoram-ah COVID-19 hri kai 59 hmuhchhuah niin heng zinga mi 36 te chu tunhnaia Bihar Assembly inthlanpui-a duty rawn haw te an ni a, Inrinni-a hri kai hmuhchhuah ah anmahni kaihhnawih a hri kaichhawng erawh an awm ta lo thung a ni.

Heti hian nimin thleng khan Mizoram-ah COVID-19 hri kai hmuh-chhuah chu 3393 an tling ta a, an zinga mi 2855 te chu enkawl dam ni tawhin tunah hri kai enkawllai 534 an la awm mek a, hri kai te zingah nunna chan mi 4 awm tawhin nimin khan mi 35 enkawl dam leh an ni.

India-ah hri kai zaa 93 chuang enkawl dam an ni tawh :

India rama COVID-19 hri kai hmuhchhuah zingah zaa 93 chuang enkawl dam an ni tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah COVID-19 hri kai mi 42,156 te chu enkawl dam leh niin tun thlengin hri kai mi 82,05,728 enkawl dam an ni tawh a, hei hi hri kai hmuhchhuah zawng zawng atanga chhutin za zela 93.09 a ni.

Darkar 24 kalta chhung khan India ramah Sample 8,05,589 enfiah niin hri kai 41,100 hmuhchhuah leh an ni a, tun thlengin India rama hri kai hmuhchhuah chu 88,14,579 an tling tawh bawk a, tunah hian hri kai enkawllai 4,79,216 la awmin hei hi hri kai hmuhchhuah atangin zaa 5.44 niin nunna chan mi 1,29,635 an awm tawh bawk a, hei hi hri kai hmuh atanga chhutin zaa 1.47 a ni bawk.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »